Pa presion te Zvicra

Zvicra po vazhdon përgatitjet në Francë, aty ku pas tri ditësh do të luan me kuqezinjtë.

Fytyra të qeshura dhe shumë optimizëm për ndeshjen me Shqipërinë. Ishte kjo panorama e stërvitjes së fundit të Zvicrës zhvilluar në stadiumin “Stade de la Mosson” ku luan skuadra e Montpellier, shkruan albinfo.ch.

Grupi i futbollistëve që ka në dispozicion trajneri Valdimir Pektoviq është i plotë dhe në gjendjen optimale. Nga Valon Behrami te Xherdan Shaqiri e Blerim Xhemaili për të vazhduar me Admir Mehmedin dhe Granit Xhakën, me përjashtim të Shani Tarashajt, janë pesë futbollistët me origjinë shqiptare që pritet ta nisin si titullarë sfidën e së shtunës në Lens ndaj kombëtares kuqezi.

Në seancën e fundit përfaqësuesja helvete punoi më shumë nga ana taktike, ndërkohë që trajneri Vladmir Pektovic zhvilloi edhe një analizë me të gjithë lojtarët. Në këtë stërvitje të Zvicrës nuk munguan mediat që në stadiumin e Montpellier ishin të shumta. Shaqiri dhe Xhemaili kishin kohë të zhvillonin edhe një bisedë të shkurtër mes tyre ndërkohë që mjaft aktiv ishin mesfushori Gelson Fernandez dhe sulmuesi Breel Embolo i cili është riaftësuar plotësisht nga dëmtimi dhe pritet të luajë që nga fillimi ndaj Shqipërisë.