OBRM-PDUKM demanton se janë pranuar propozimet e tyre për Ligjin për PSP-në

Partia opozitare maqedonase OBRM-PDUKM, ka reaguar ndaj deklaratave të Zoran Zaevit, i cili sot tha se janë pranuar një pjesë e propozimeve të opozitës në lidhje me Ligjin e Prokurorisë Publike.

Nga OBRM-PDUKM thonë se kryeministri Zaev nuk e ka lexuar propozimin e ri, të cilin ministrja e Drejtësisë Renata Deskoska e ka dorëzuar tek përfaqësuesi i tyre, njofton Telegrafi Maqedoni.

“Ose Zoran Zaev nuk e ka lexuar propozimin e ri të cilën ministrja e Drejtësisë, Renata Deskoska, e ka dorëzuar tek përfaqësuesi i OBRM-PDUKM-së, ose vazhdon me vetëdije të mos e flet të vërtetën në opinion dhe kurdis se kinse pushteti është bashkëpunues”.

“E dyta, e papranueshme është retorika e pushtetit dhe parimi merre ose lëre të cilat nuk shkojnë në interes të procesit. E treta, pushteti mundet në mënyrë artificiale të formojë dy të tretën e shumicës siç e tregoi edhe praktikisht periudhën e kaluar por ajo nuk do të sjell cilësi të reformave as edhe do t’u jep legjitimitet pa marrëveshje me OBRM-PDUKM-në”, thuhet në reagimin e opozitës maqedonase.

Ata shtojnë se udhëheqja e tillë eventuale e procesit nënkupton tregim të muskujve në politikë dhe asnjëherë nuk mund të jetë reformë, por hallkë e përllogaritjes së Zaevit me kundërshtarët politik.

Ndryshe, sot kryeministri Zaev njoftoi se është arritur pajtueshmëri për disa çështje me opozitën për Ligjin për PSP-në, duke shtuar se “bombat” nuk do të përdoren si dëshmi për rastet që janë hapur pas skadimit të afatit të PSP-së./Telegrafi/