Ndëshkime të ndryshme shkaku mosrespektimit të masave kundër COVID-19: Nga pompat deri tek turpërimi në publik

Njerëzit në të gjithë botën po protestojnë kundër masave që janë futur për shkak të coronavirusit.

Shumica janë të zemëruar për gjobat drakoniane të vendosura nga autoritetet për mos vendosjen e maskës.

Gjersa në disa vende evropiane mund të gjobiteni nga 20 deri në disa qindra euro, në Indonezi do të mund të zgjidhni formën e dënimit, transmeton Telegrafi.

Përkatësisht, pasi që edhe “goditja” në xhep nuk i qytetëroi qytetarët dhe nuk mundi t’i detyrojë të mbanin pajisje mbrojtëse, policia filloi të zbatojnë një sistem të ri të dënimit – turpërimin në publik.

Kështu që disa ditë më parë, një djalë që kaloi një pikë kontrolli pa maskë, duhej të bënte pompa para syve të policisë.

Ata nuk janë të vetmit që kryejnë “dënime të çuditshme”. Në Tajlandë, një djalë duhej të këndonte me zë të lartë në mes të rrugës himnin kombëtar. Në Java, ata që nuk respektojnë masat u detyruan të shkojnë në funeralet e viktimave të coronavirusit, në mënyrë që të vetëdijesohen.

Kishte gjithashtu raste kur qytetarët duhej të pastronin hapësirat publike duke veshur një jelek portokalli ku shkruhej “Unë shkela masat e zyrtarëve shëndetësorë”.

Për të gjithë ata që mendojnë se kjo është një mënyrë mizore e ndëshkimit, ata duhet të hetojnë se çfarë po ndodh në Ganë. Atje, qytetarët mund të marrin deri në 10 vjet burg për mospërmbushje të masave dhe të paguajnë gjobë prej 8,800 eurove nëse kapen pa maskë.

Në Tajlandë, një familje nga Zvicra u dënua me dy muaj burg sepse hëngrën darkë në oborr kur filloi shtetrrethimi. Ata u kapën nga policia duke ngrënë supë në oborr, 20 minuta pasi filloi shtetrrethimi dhe menjëherë u arrestuan.

Pronari i një restoranti në Malajzi po vuan dënimin me pesë muaj burg sepse vendosi të punoj edhe pse është dashur të vetizolohet për shkak të infektimit me coronavirus.

Në Singapor, taksisti u dënua me katër muaj burg sepse shkroi një mesazh në Facebook, duke pohuar se kishte dëgjuar që dyqanet do të funksiononin vetëm dy herë në javë. Megjithëse e fshiu mesazhin pas 15 minutash, qytetarët filluan blerjet në panik gjersa u dënua për shkaktimin e panikut dhe përhapjen e lajmeve të rreme. /Telegrafi/