Nagavci: Është koha e fundit që në këtë vend të ketë llogaridhënie

Deputetja e Lëvizjes Vetëvendosje, Arbërie Nagavci, ka thënë se, qytetarët e vendit presin përgjegjësi nga Lëvizja Vetëvendosje, si subjekti i parë politik pas zgjedhjeve te 6 tetorit.

Përmes një shkrimi në Facebook, Nagavci konsideron se, LVV ka vendosur standarde të tjera kundrejt partive tjera politike dhe këto standarde duhet mbajtur, pasi thekson se në Kosovë duhet të këtë llogaridhënie.

“Kërkesat e qytetarëve nga dhe për Lëvizjen Vetëvendosje me të drejtë janë të shumta dhe të veçanta. Kjo është e pritshme, ne kemi vendosur tjera standarde dhe ato duhet e do t’i mbajmë lartë. Qytetarët na besuan, tani do të na mbajnë përgjegjës, dhe bëjnë mirë. Është koha e fundit që në këtë vend të ketë llogaridhënie”, ka thënë ajo.

Më tej ka theksuar se, deri me tani Kosova ka pasur shumë pazare kompromise, duke përmendur Listën Serbe e Gjykatën Speciale.

“Një është e sigurt. Përfaqësuesit e Lëvizjes, tani gjithnjë më shumë e më shpesh do të marrin pjesë në takime e ngjarje në rajon dhe gjithandej. Përfaqësimi e negocimi s’do të jetë gjithnjë i lehtë sepse shumë pazare e kompromise të dëmshme për Kosovën, si simbolet, Lista Serbe, Gjykata Speciale e dëme të tjera janë bërë tashmë. Andaj dhe duhet të kemi besim e dinjitet, mbështetje e kujdes”, ka shtuar ajo, njofton Telegrafi.

Nagavci pret që së shpejti të bëhet Qeveria që të vazhdohet me  përfaqësimin e Kosovës, siç ka thënë brenda dhe jashtë vendit.

“Ne në Lëvizje këtë e dimë mirë dhe secili që përfaqëson Lëvizjen dhe qytetarët mbron interesat e tyre, delegohet dhe raporton. Si gjithnjë jemi maksimalisht të përkushtuar e plotësisht të angazhuar që interesat e Kosovës t’i kemi në radhë të parë. Duhet sa më parë të konstituohet Kuvendi e të formohet Qeveria. Të filloi puna e të përfaqësohemi denjësisht si brenda ashtu dhe jashtë vendit. Të jemi palë të barabarta si me miqtë ashtu dhe përballë atyre që s’na njohin e na mohojnë, sepse ne jemi realitet i padiskutueshëm”, ka shkruar Nagavci.