Mustafa uron pesë presidentët në Ditën e Presidentit

Kryeministri i Kosovës, Isa Mustafa ka thënë se 24 maji, Dita e Presidentit të Republikës së Kosovës është një prej datave që na përkujton arkitektin e shtetit të Kosovës, Ibrahim Rugova, i cili sipas tij, me vizionin dhe veprën e tij vuri themelet e shtetësisë së Kosovës.

Mustafa, në Facebook shkruan se Ibrahim Rugova është simbol i unitetit dhe vendosmërisë së paepur të popullit të Kosovës në rrugën drejt lirisë, pavarësisë dhe demokracisë.
Kryeministri ka uruar dhe ish presidentët e tjerë në këtë ditë, si dhe presidentin aktual Hashim Thaçi.

Postimi i plotë:

Të dashur miq,

Sot është Dita e Presidentit të Republikës së Kosovës.

Kjo datë na përkujton 24 majin e vitit 1992, kur u mbajtën zgjedhjet e para presidenciale, në të cilat qytetarët e Kosovës zgjodhën për herë të parë Presidentin e Republikës së Kosovës, Dr. Ibrahim Rugova.

24 maji është një prej datave që na përkujton arkitektin e shtetit të Kosovës, i cili me vizionin dhe veprën e tij kolosale vuri themelet e shtetësisë së Kosovës.

Ibrahim Rugova ishte simbol i unitetit dhe vendosmërisë së paepur të popullit të Kosovës në rrugën drejt lirisë, pavarësisë dhe demokracisë.

Vepra e Presidentit Historik Rugova vazhdon të jetë edhe sot frymëzim në avancimin e rrugës euroatlantike, në thellimin e miqësisë me Shtetet e Bashkuara të Amerikës dhe vendet e BE-së, si dhe në progresin e gjithmbarshëm të shtetit.

Me këtë rast, ua uroj këtë ditë edhe presidentëve që pasuan Presidentin Rugova, Sejdiun, Pacollin, Jahjagën dhe presidentin aktual, Hashim Thaçi.

Nder dhe lavdi të përjetshme Presidentit Historik të Kosovës, Dr. Ibrahim Rugova. IM