Mustafa: Korrupsioni problem, por jemi më mirë se rajoni

Kryeministri Isa Mustafa, ka thënë se Kosova po përballet me vështirësi me korrupsionin, por prapë se prapë, vendi që ai drejton qëndron më mirë se shtetet e rajonit.

Duke iu referuar raportit të fundit të Transparency International që u publikua të enjten nga KDI-ja, ku thuhej se shqetësimi kryesor i kosovarëve është korrupsioni, Mustafa thotë se ky raport mund të na hyjë në punë për t’i zbutur problemet dhe për ta luftuar korrupsionin.

“Dje u publikua raporti i fundit i Transparency International nga KDI. Ky raport duhet të na shërbejë për të përmirësuar fushat e nevojshme dhe për të forcuar luftën kundër korrupsionit, por po ashtu edhe që ta shohim gjendjen faktike në terren rreth kësaj problematike. Në anën e ndritshme, Kosova ka gjendjen më të mirë nga të gjitha vendet e rajonit sa i përket kushtëzimit të qytetarëve me korrupsion për shërbime. Jemi më mirë se 6 vende të BE-së; baras me Greqinë dhe Kroacinë e më mirë se po thuaj të gjitha vendet e Evropës Qendrore e Juglindore. Me rajon, larg në gjendje më të mirë”, ka thënë Mustafa, përmes profilit të tij në Facebook.

Ndër të tjerash, kryeministri shkruan se korrupsioni mund të luftohet vetëm nëse qëndrojmë të bashkuar kundër tij, dhe bën thirrje që ta lajmërojnë kur dikush e shfrytëzon emrin e tij për përfitime të çfarëdoshme.

“Me gojën plot korrupsion ne po e dëmtojmë imazhin tonë dhe po i frikësojmë investitorët. Korrupsionin do ta mundim nëse e luftojmë bashkë. Do ta mundim nëse e lajmërojmë. Lajmëromëni edhe mua, nëse dikush thirret në emrin tim për të fituar materialisht, qoftë si kryeministër qoftë si kryetar i LDK-së”, deklaron Mustafa.