Misionet e BE-së në Kosovë vlerësojnë bashkëpunimin e ish-krerëve të UÇK-së me Specialen

Udhëheqësit e Misioneve në Kosovë të BE-së dhe të Shteteve Anëtare përmes një deklarate për të përbashkët vlerësuan se bashkëpunimi me Dhomat e Specializuara nga ish-presidenti i Kosovës, Hashim Thaçi, ish-kryetarët e Kuvendit, Jakup Krasniqi dhe Kadri Veseli si dhe ish-deputeti i LVV-së, Rexhep Selimi pasqyron përgjegjësinë dhe vendosmërinë e Kosovës për respektim e sundim të ligjit.

Në deklaratë thuhet se Kosova duhet të mbetet e përkushtuar ndaj këtij procesi.

Deklarata e plotë:

Deklaratë nga Udhëheqësit e Misioneve të BE-së dhe të Shteteve Anëtare të BE-së në Kosovë

Udhëheqësit e Misioneve në Kosovë të BE-së dhe të Shteteve Anëtare e marrin parasyshë dorëheqjen e Presidentit të Kosovës, Hashim Thaçi. Ne e vlerësojmë bashkëpunimin e treguar në ditët e fundit nga Presidenti Hashim Thaçi dhe ish udhëheqësi i PDK-së Kadri Veseli, si dhe nga z. Rexhep Selimi dhe ish Kryetari i Kuvendit Jakup Krasniqi, me Dhomat e Specializuara. Për më tepër, ne i vlerësojmë fjalimet drejtuar publikut të mbajtura dje nga z. Thaçi dhe z. Veseli, të cilët bënë thirrje për respektimin e procesit gjyqësor.

Kjo pasqyron përgjegjësinë dhe vendosmërinë e Kosovës për respektim të sundimit të ligjit dhe për kërkim llogarie nga individët që mund të kenë kryer veprime të paligjshme. Nuk duhet harruar se sipas ligjit, individët nën aktakuzë janë të pafajshëm derisa të vërtetohet fajësia e tyre, dhe se duhet të respektohen të drejtat e tyre ligjore. Kosova duhet të mbetet e përkushtuar ndaj këtij procesi.

Prioriteti më vendimtar për BE-në dhe Shtetet e saj Anëtare, është respektimi i sundimit të ligjit, demokracisë dhe të drejtave të njeriut. Për këtë arsye, ne e kemi mbështetur fuqimisht krijimin e Dhomave të Specializuara, si pjesë integrale e sistemit të Kosovës për sundimin e ligjit, dhe do të vazhdojmë ta bëjmë këtë derisa të përmbushet misioni i Dhomave, ndaj të cilave edhe Kosova është e përkushtuar. Kjo është esenciale për konsolidimin e perspektivës evropiane të Kosovës. /Telegrafi/