Merkel do të kërkojë zgjatjen e masave kundër pandemisë

Kancelarja gjermane Angela Merkel po kërkon të zgjasë kufizimet për të parandaluar përhapjen e coronavirusit deri në muajin prill, raporton AFP, duke cituar një dokument qeveritar.

Diskutimet e kancelares Merkel me udhëheqësit e landeve do të zhvillohen të hënën (22 mars). Gjermania po përballet me një rritje të numrit të të infektuarve me coronavirus. Agjencia DPA raporton se për shkak të kësaj situate, Qeveria mund të marrë masa shtesë të izolimit.

Gjatë javës së kaluar numri i të infektuarve për 100 mijë banorë për të gjithë Gjermaninë është rritur në 103.9, tha të dielën Instituti për Sëmundje Infektive, Robert Koch (RKI).

Tejkalimi i shifrës 100 shpesh do të thotë se rregullat kundër pandemisë duhet të fuqizohen. Për shembull, të premten, autoritetet në qytetin e Hamburgut shtrënguan masat e kontrollit pasi niveli shtatë-ditësh u rrit mbi 100. Tani ky rajon është në një bllokim shumë më të ashpër.

Të dielën (21 mars) u raportuan 13,733 raste të reja të të infektuarve, derisa një javë më parë ishin raportuar 10.790. Autoritetet regjistruan 99 vdekje të reja të lidhura me sëmundjen COVID-19, ndërsa të dielën e kaluar ishin raportuar 70 viktima.

Sipas RKI, që nga fillimi i pandemisë në Gjermani janë shënuar 2.659.516 raste me coronavirus. Numri i përgjithshëm ka të ngjarë të jetë shumë më i lartë, pasi shumë raste të të infektuarve nuk zbulohen. /REL/