“Mediat greke të shqetësuara për çështjen e emrit”

Mbërritja në Aeroportin e Shkupit, pas 12 vitesh të një zyrtari grek në Maqedoni, të Ministrit të jashtëm grek, por edhe pozicionet e kundërta gjatë bisedimeve për emrin, janë pjesë e debatit në mediumet greke, posaçërisht vëmendje tërheqin tekstet e të dyja palëve. Sipas televizionit shtetëror grek ERT, klima e zhvillimit të bisedimeve është e çuditshme.

Qëndrimi nga ana e Shkupit që menjëherë të dërgojë një tekst me vërejtje, dy ditë para takimit, sipas këtij mediumi, kishte shqetësuar Athinën, sepse kjo nuk kishte qenë e parashikuar me marrëveshjen që kishin bërë të dy kryeministrat në Davos. Më tej thuhet se teksti përmban qëndrim radikal të pozicioneve nga pala e Shkupit. Shihet se në të dyja tekstet nga Athina dhe Shkupi, kanë dallime, ndërsa “nyja” kryesore është Kushtetuta. Pala greke insiston që të ketë ndryshime kushtetuese dhe ndryshimin e emrit kushtetues sepse vetëm ashtu do të vlejë për përdorim të përgjithshëm.

Ndërkohë, opozita greke vazhdon të jetë pesimiste për zgjidhjen e kontestit bilateral. Nënkryetari i partisë Demokracia e Re, Kostis Hacidakis, pas pres konferencës së dy ministrave të jashtëm në Shkup, ka deklaruar për televizionin grek Skaj se, kontesti i emrit është vështirë që të zgjidhet dhe se vështirë se marrëveshja eventuale do të mbërrinte në kuvendin grek.

Ai tha se nuk është optimist që Qeveria aktuale greke do të mund të sillte marrëveshje në Kuvend, por edhe nëse e bën këtë, pas reagimeve të popullit do të ndryshonte taktikë.