Mbipunësimi në ndërmarrjet publike largon investitorët

Mbipunësimet në ndërmarrjet publike mund të largojnë investitorët e mundshëm që janë të interesuar për të blerë disa nga ndërmarrjet e mbetura të privatizimit.
Deri më tani disa kompani ndërkombëtare që kanë blerë ish ndërmarrjet shoqërore në Kosovë, kanë hasur në probleme me punëtorë që kanë qenë në numër të madh. Përfaqësues të bizneseve dhe njohës të zhvillimeve ekonomike ne vend, janë shprehur se në të ardhmen në rast të privatizimit të ndërmarrjeve publike, nuk duhet që të jetë kusht ruajtja e vendeve të punës, por qeveria duhet që të merret me një politikë të caktuar për ta.

Kryetari i Aleancës Kosovare të Bizneseve (AKB), Agim Shahni ka thënë se mbi punësimi në ndërmarrjet publike të Kosovës, është bërë me projekte dhe me strategji të kompanive, por ka mbizotëruar në disa raste edhe ndikimi politik nga jashtë e që kjo në shumë kompani kjo ka krijuar krizë. ‘Në disa kompani kjo ka rezultuar se nuk ka krijuar ndonjë humbje të theksuar, për shkak se kompani është zhvilluar”, ka thënë ai. Sipas tij për investitorët e huaj kjo është ngarkesë në të ardhmen, nëse duhet të privatizohet”, ka thënë ai.

Shahini ka thënë për gaztën “Epoka e re”, se nuk duhet të merren kriteret në të ardhmen, gjatë privatizimeve që një kompani të vij në Kosovë dhe të blejë një ndërmarrjeve dhe të mbaj punëtorët, pasi që ajo për ta është ngarkesë. “Duhet që të kemi një strategji se kush krijon investime strategjike dhe punësim dhe nuk duhet që të çmimi i shitjes së ndërmarrjeve. Kjo ka ndodhur në të kaluarën dhe tani po i bartim pasojat e dështimeve”, ka thënë Shahini.

Kurse njohësi i zhvillimeve ekonomike në vend, Labinot Lekaj, ka vlerësuar se dukuria e mbi punësimeve i ka karakterizuar shumicën e ndërmarrjeve publike të Kosovës që nga paslufta. “Ky fenomen është një indikator mjaft shqetësues për investitorët potencial, dhe ndikon negativisht në joshjen e këtyre investitorëve! Edhe në të kaluarën është dëshmuar që ky fenomen ka treguar që këto ndërmarrje publike, pikërisht për shkak të mbi punësimeve, të joshin një numër jashtëzakonisht të vogël të investitorëve të huaj”, ka deklaruar Lekaj për gazetën “Epoka e re”.

Sipas tij pothuajse asnjë kompani serioze ndërkombëtare nuk ka shfaqur interesim për të privatizuar ndonjërën nga ndërmarrjet publike të mëdha, si është KEK-u dhe PTK-ja. Lekaj, ka thënë se ruajtja e vendeve të punës edhe pas privatizimit të ndërmarrjeve publike është një nga problemet kryesore me të cilin janë ballafaquar si Qeveria në njërën anë e po ashtu edhe investitorët në anën tjetër.

“Kushtëzimi i ruajtjes së vendeve të punës në ndërmarrjet publike ku niveli i mbi punësimit ka qenë jashtëzakonisht i lartë, do të ndikonte negativisht në joshjen e investitorëve serioz. Kjo për faktin se kompanitë e mëdha ndërkombëtare dhe me përvojë për shkak të zhvillimeve teknologjike të avancuara janë të interesuara që me një numër sa më të vogël të punëtorëve të kryejnë shërbime sa me efikase”, ka thënë Lekaj. /Telegrafi/