Lufta në Ukrainë ia pakësoi personelin ushtarak, rusët po përgatisin një rekrutim të ri – ushtria kërkon 400 mijë ushtarë “të freskët”

Nga 1 prilli, Ministria ruse e Mbrojtjes do të fillojë një rekrutim të ri të ushtarëve profesionistë në ushtrinë ruse, me synimin për të shtuar 400 mijë rekrutë të rinj në ushtri.

Siç raporton Radio Svoboda, Ministria e Mbrojtjes e Rusisë dërgoi dokumente në rajone, ku thuhej numri i njerëzve me të cilët duhet të nënshkruhen kontrata, transmeton Telegrafi.

Radio Svoboda njofton se disa media rajonale ruse njoftuan menjëherë numrin e përgjithshëm të personelit me kontratë të nevojshme, për të plotësuar ushtrinë ruse. Rusia raportohet se po planifikon të rekrutojë 400 mijë ushtarë të tillë.

Gjithashtu është bërë me dije se pjesën kryesore të punës do ta bëjnë zyrat ushtarake, e guvernatorët do të jenë përgjegjës për zbatimin e planit.

Lexo po ashtu Ukrainasit përfundojnë me sukses trajnimet për tanket Leopard 2

Është njoftuar se 10 mijë njerëz duhet të rekrutohen për shërbime profesionale në rajonet Chelyabinsk dhe Sverdlovsk të Federatës Ruse, dhe 9 mijë të tjerë në rajonin e Permit.

Thashethemet për fillimin e valës së dytë të mobilizimit në Rusi për shkak të mungesës së personelit ushtarak për të vazhduar luftën në Ukrainë, janë shfaqur periodikisht në media që nga fundi i vitit të kaluar.

Shërbimet e inteligjencës të disa vendeve perëndimore dhe autoritetet e Ukrainës kanë paralajmëruar për ngjarje të tilla. /Telegrafi/