Ligji për fertilizimin e asistuar mollë sherri për ligjvënësit e shumicës parlamentare

Ligji për shëndetin riprodhues dhe fertilizimin e asistuar, vazhdon të jetë problematik për deputetët në Kuvendin e Kosovës.

Menjëherë pas Kodit Civil, ligji për shëndetin riprodhues dhe fertilizimin e asistuar është i dyti në listë si mollë sherri mes deputetëve të shumicës.

Akoma vazhdon të mos kalojë në lexim të dytë ky projektligj tashmë problematik, duke u gjendur para votave kundër, abstenime e mospjesëmarrjeve në votim.

Për fertilizimim e asistuar për gratë që nuk arrijnë shtatzëni të dëshiruar me rrugë natyrore nuk po pajtohen të gjithë deputetët.

Dertin më të madh e kanë me faktin se ligji do të vlente edhe për gratë e pa martuara.

“Për mua personalisht do të ishte shumë logjike që fertilizimi i asistuar mjekësor të shfrytëzohej nga çiftet, pra të kemi donorë homologë për qiftin brenda martesës,  jo të kemi donorë hetërologë ngaqë ndjeshmëria është e madhe, në momentin që kemi aplikim heterolog, incesti është i pashmangshëm, në përgjithësi kjo si problem i parë dhe e dyta e padrejtë për secilin fëmijë që vjen nga një donim heterolog, që gjithë jetën e tij ta kalojë duke munduar ta gjejë prindin e tij biologjik, është e papranueshme dhe jo humane“, ka deklaruar deputetja Labinotë Demi-Murtezi.

Lexo po ashtu Shtyhet shqyrtimi i dytë i Projektligjit për shëndetin riprodhues dhe fertilizim të asistuar mjekësor

Por ndryshe nga kolegia e tij në grup parlamentar, Haxhi Avdyli thotë se duhet të bëhen kompromise për qiftet që duan të bëhen prindër.

“Mundësia e dështimit është por besojmë që do të mbizotërojë arsyeja e gjithë deputetëve edhe nga opozita dhe ky ligj do të kalojë. Sepse ka të bëjë me një grup drejtpërdrejt shumë të prekur, të qytetarëve të cilët luftojnë, ta kenë trashëgimtarin e tyre, dhe mendoj që në këtë drejtim duhet ti përkrahim. Edhe me ligjin edhe me krijimin e kushteve në spitale publike”, ka deklaruar Avdyli.

Të ashpër me deputetët që nuk po e votojnë tregohen shoqëria civile të cilët në vazhdimësi përmendin emrat ligjvënësit dhe kërkojnë shkarkimin e tyre.

“Ata janë aty për t’i mbrojtur të drejtat e grave dhe jo për ti cenuar apo për t’iu vendosur kufij, ne jemi të pa kompromis në këtë drejtim, ne mendojmë që Duda Balje duhet të shkarkohet nga komisioni për të drejtat e njeriut, për shkak të deklarimeve t3ë saj një ashtu gjuha e përdorur nga deputetët e tjerë, s’pranohet. I bëjmë thirrje Glauk Konjufcës mos ta mbrojë Eman Rrahmanin”, ka deklaruar Leonida Molliqaj nga organizata Qika.

Për herë të fundit ky projektligj shkoi në kuvend seancës e së enjtes së kaluar, që për shkak të mosvotimit të Eman Rrahmanit nuk pati kuorum për procedim.