Kryeministri ukrainas: Na duhen më shumë gjeneratorë për t’i mbijetuar dimrit

Kompanitë ukrainase kanë importuar rreth gjysmë milioni gjeneratorë të energjisë elektrike, por vendit i duhen mijëra të tjerë, më të mëdhenj dhe më të fortë, për të kaluar dimrin.

Kështu të paktën pretendon kryeministri ukrainas Denys Shmyhal, i cili pranoi se situata në Ukrainë është e rëndë, transmeton Telegrafi.

Që nga tetori, Ukraina është përballur me ndërprerje në rritje për shkak të sulmeve ruse në infrastrukturën e saj energjetike.

Operatori ukrainas i rrjetit Ukrenergo, tha pas sulmeve të fundit ajrore ruse, koha e riparimit do të jetë më e gjatë se pas sulmeve të mëparshme, dhe se do të duhej më shumë kohë për të rikthyer energjinë.

Shmyhal tha gjatë mbledhjes së qeverisë ukrainase, se këtij vendi do t’i nevojiten edhe më shumë gjeneratorë gjatë muajve këtyre muajve të dimrit.

“Sipërmarrësit e vegjël dhe të mesëm ukrainas kanë importuar tashmë 500,000 gjeneratorë me fuqi të ulët. Por për të mbijetuar dimrin, do të na duhen rreth 17,000 gjeneratorë të mëdhenj dhe industrialë, shtoi ai.

“Ne shpresojmë të mbulojmë disa nga këto nevoja me ndihmën e partnerëve tanë”, tha krejt për fund kryeministri ukrainas. /Telegrafi/