Janari i kobshëm për rusët – humbin gati 1000 ushtarë në Ukrainë

Gati 1000 ushtarë rusë është konfirmuar se janë vrarë në Ukrainë që nga fillimi i vitit 2023, bazuar në të dhënat e pavarura mediatike nga fushëbetejat.

Numri i vdekjeve të verifikueshme të Rusisë tani është 11,662 trupa pasi u shtuan 942 emra midis 1 dhe 17 janarit, shkruan Mediazona. Numri real besohet të jetë shumë më i lartë.

“Është një super rekord”, tha redaktori i Mediazona, Dmitry Treshchanin në një transmetim të drejtpërdrejtë në YouTube, shkruan themoscowtimes.

Ai e lidhi shkallën e lartë të vdekjeve me këmbënguljen e autoriteteve ruse për ta pushtuar Bakhmutin, një qytet strategjik në Ukrainën lindore, ku analistët thonë se forcat ruse po bëjnë përfitime margjinale pas disa muajsh beteje me humbje të rënda, transmeton Telegrafi.

Numri i të vdekurve përfshin gjysmën e 89 ushtarëve të mobilizuar rusë që u vranë në një sulm ukrainas në natën e Vitit të Ri në një kazermë të përkohshme në Makiivka të pushtuar nga Rusia.

Baza e të dhënave të Mediazona tani përfshin gjithashtu ushtarë që luftuan për grupin famëkeq Wagner, mercenarët e së cilës përbëjnë pjesën më të madhe të forcave të përfshira në pushtimin e Bakhmutit.

Përveç vullnetarëve që monitorojnë varrezat nëpër shumë qytete dhe fshatra ruse, gazeta përdor deklarata zyrtare, rrjete sociale dhe raportime mediatike për të përditësuar shifrat e saja.

Ndërkohë, presidenti rus, Vladimir Putin porositi 21 krematoriume të lëvizshme, ku do të shkrihen trupat e pajetë të ushtarëve të vdekur rusë në Ukrainë. /Telegrafi/