Imazhet satelitore tregojnë se si Irani ndërton gropa për varrosjen e viktimave të coronavirusit

Irani ka zgjeruar me shpejtësi një varrezë të madhe në Qom, që është zona më e goditur nga shpërthimi i coronavirusit.

Vendi ka raportuar të paktën 10.075 raste të konfirmuara të coronavirusit dhe 429 vdekje, shteti i tretë me më së shumti vdekje dhe të infektuar pas Kinës dhe Italisë, shkruan CNN.

Imazhet satelitore të nxjerra nga Maxar Technologies, duket se tregojnë një rritje të aktivitetit brenda varrezave Behesht-e Masoumeh në Qom.

Sipas traditës islame, trupat supozohet të varrosen shpejt pas vdekjes. Por drejtori i morgut të Behesht-e Masoumeh Ali Ramezani tha për TV-në shtetëror iranian në fillim të këtij muaji se varrosjet po vonoheshin pasi testimi për virusin kërkon kohë.

Dhe ndërsa kufomat tradicionale lahen me sapun dhe ujë para varrosjes në Iran, dy punonjës të mjekësisë në Qom i thanë CNN se në disa raste masat paraprake në lidhje me shpërthimin po e pengojnë personelin të respektojë udhëzimet tradicionale islamike për varrosje.

Viti i Ri Persian, ose Nowruz, është të premten, më 20 mars. Shumë familje iraniane vizitojnë varrezat para fundit të vitit Persian, si pjesë e traditës.

Udhëheqësi Suprem i Iranit, Ajatollahu Ali Khamenei ka hequr fjalimin e tij vjetor për Nowruz, njoftoi të hënën agjencia shtetërore e lajmeve IRNA. Khamenei nuk do të udhëtojë në qytetin e Mashhadit, vendin e faltores së Imam Reza, ku zakonisht mbahet fjalimi.

Irani ndërmori masa drastike javën e kaluar për të ndaluar përhapjen e virusit. Qeveria ndaloi lutjet e së Premtes në qendrat e të gjitha provincave në të gjithë vendin. Shkollat ​​dhe universitetet janë mbyllur. Koncertet dhe ngjarjet sportive janë anuluar. Të gjitha 31 provincat e Iranit janë goditur nga virusi, me një numër zyrtarësh të profilit të lartë që janë sëmurë nga ky virus.

Ish Ministri i Jashtëm i Iranit dhe këshilltari aktual për Khamenei, Ali Akbar Velayati, testoi pozitiv për virusin dhe u fut në karantinë në shtëpinë e tij në Teheran, njoftoi të martën agjencia e lajmeve iraniane ISNA. /Telegrafi/