Haxhiu: PSD tregon hipokrizi nëse nuk na bashkohet në protestë

Deputetja e Kuvendit të Kosovës nga radhët e Lëvizjes Vetëvendosje, Albulena Haxhiu, në lidhje me protestat kundër presidentit Thaçi, flet edhe për mosdaljen në protesta të PSD-së, për të cilët thotë se nëse nuk dalin tregojnë hipokrizi.

“Ne u kemi bërë thirrje të gjitha subjekteve politike, përkrahësve të tyre që të bëhen pjesë e kësaj proteste, por sa i përket përgjigjes së tyre se nuk kanë marrë ftesë nga Vetëvendosja, më duket pak e çuditshme për shkak se ne nuk u dërgojmë ftesa nëpër zyrat e tyre subjekteve politike”, ka thënë Haxhiu për Zërin.

“Arsyeja se pse ne në fillim i kemi shkruar LDK-së ka qenë për faktin se ne e kemi thirrur LDK-në që bashkë ta organizojmë një protestë të tillë, por po ashtu Grupi Parlamentar i PSD-së në paraqitjet e tyre, sidomos z. Molliqaj, kanë thënë që kanë ndryshuar metodat dhe nuk e shohin si mundësi që përmes protestave të ketë reagime. Prandaj edhe nëse ata janë kundër Hashim Thaçit dhe kundër kësaj ndërmarrjeje të tij, atëherë edhe ata duhet t’i bashkohen protestës, në të kundërtën të gjitha deklarimet e tyre janë hipokrizi”, ka thënë deputetja e VV-së.