Haradinaj i përgjigjet Thaçit: Nuk e kanë gjetur njeriun me folë me këtë gjuhë (Video)

Kryeministri i Kosovës, Ramush Haradinaj ka thënë se ideja e korrigjimit të kufijve ka vdekur.

Haradinaj, në “Debat Plus” në RTV Dukagjini, ka thënë se Thaçi njëherë na ka lënë probleme me Malin e Zi, por më probleme të tjera nuk do të ketë.

“Unë mund të korrigjohem apo largohem, por kufijtë nuk do të korrigjohen”, tha ai.

Haradinaj ka thënë se kufijtë janë vendosur me luftë dhe është e pamundur të merret Lugina e Preshëvës, pasi atje Serbia ka vendosur forca të shumta ushtarake.

“Nuk e përkrahi një opsion të korrektimit të kufirit pasi kjo i bjen ndarje e Kosovës… Serbia në Preshevë ka prezencë të madhe ushtarake”, tha ai, përcjell Telegrafi.

I pari i Qeverisë, duke folur për deklaratat e Thaçit se mund të rrëzojë Qeverinë, ka thënë se është i gatshëm ta lëshojë karrigen, sepse ai thotë se e ka lënë karrigën e kryeministrit edhe herëve tjera.

“Mund t’ia jap karrigen me vete Thaçit. Unë jam mësuar të lëshoj karrige edhe kur kam shkuar në Hagë”.

Haradinaj ka thënë se ai nuk shantazhohet nga askush për pozita.

“Nuk e kanë gjetur njeriun me folë me këtë gjuhë”, tha Haradinaj.

Duke komentuar deklaratën e presidentit Thaçi në konferencën e djeshme të tij, për korrigjim të Haradinajt, kryeministri deklaroi se “presidenti i vendit me kujtuar se duhet t’i korrigjojë të tjerët, kështu nuk ndodh në vendet demokratike, sepse çdonjëri ka bindjet e veta”.

“Kush korrigjohet përpara të shohim, jeta është e gjatë dhe unë jam këtu”, ka thënë Haradinaj, ndërsa ka shtuar se hapja e territorit, nuk është  e drejtë e tij, dhe e askujt tjetër./Telegrafi/