​Haradinaj demanton mediat që cituan avokatin serb: Nuk jam subjekt i asnjë procesi gjyqësor

Kryetari i AAK-së Ramush Haraidnaj, ka demantuar avokatin serb, Pregrad Saviq, i cili ka thënë se ndaj tij është ngritur aktakuzë nga Gjykata Speciale.

Haradinaj përmes një statusi në Facebook ka thënë se ky është një lajmi rremë që për burim kanë eksponentë të Serbisë.

“Të dashur qytetarë, Disa media tona kanë raportuar një lajm të rremë që për burim kanë eksponentë të Serbisë. Unë me dinjitet kam mbrojtur pastërtinë e luftës së UÇK-së dhe nuk jam subjekt i asnjë procesi gjyqësor. Vazhdoj punën në mbrojtje të vlerave dhe të shtetit. RH”, ka shkruar Haradinaj.

Deklaratën për Haradinajn e ka dhënë sot avokati serb, Pregrad Saviq, i cili pretendon se në mesin e ish-anëtarëve të UÇK’së, të cilët po gjykohen për krime lufte, do të jetë i ftuar edhe kreu i Aleancës për Ardhmërinë e Kosovës (AAK), Ramush Haradinaj.

Siç shkruan portali ‘Kosovo Online’ avokati serb është shprehur i bindur se Haradinaj do jetë në mesin e të akuzuarve nga Dhomat e Specializuara të Kosovës, pasi që siç pretendon Saviq, tashmë të parit të AAK-së i është ngritur aktakuza nga Prokuroria e Dhomave të Specializuara.

Disa media kosovare e transmetuna lajmin e portalit serb pro Vuçiqit se Haradinaj tashmë ka aktakuzë nga Gjykata Speciale. /Telegrafi/