Glauk Konjufca pati një moment të sikletshëm gjatë pranimit të detyrës së ministrit

Shumica e ministrave të Qeverisë Kurti morën sot detyrat e tyre. Ministrat e rinj, folën për angazhim, ndërsa ish ministrat thanë se do të jenë në mbikëqyrje të vazhdueshme për punën që kabineti ri qeveritar.

Ministrat e koalicionit të ri qeverisës, të Vetëvendosjes e LDK-së, një ditë pas emërimit, shkuan e morën detyrat qeveritare tek paraardhësit e tyre.

Nga ministrat e ri u premtua më shumë punë e angazhim, e ish ministrat thanë se do të jenë në mbikëqyrje të vazhdueshme për punën që kabineti ri qeveritar do të bëjë në vazhdim.

Dorëzim-pranimi në Ministrinë e Jashtme në mes Behgjet Pacollit e Glauk Konjufcës u bë me disa rekomandime që ish ministri Pacolli i dha pasardhësit për mandatin e kryediplomatit.

E ministri i ri tha se është i vetëdijshëm për punë që po e pret.

Por karriga në të cilën ishte i ulur Konjufca duket se nuk ishte tamam për të. Ky incident kaloi me të qeshura mes të pranishmëve në sallë.

E në Ministrinë e drejtësisë, Albulena Haxhiu pranoi zyrtarisht detyrën e re. Ajo u takua me ministrin e deritanishëm Abelard Tahirin. Zotimi i ministres së re ishte vettingu në sistemin e drejtësisë.

Ministrja e re e arsimit, Hykmete Bajrami, në dorëzim-pranimin e detyrës nga ish ministri Shyqyri Bytyqi vuri në pah përpjekjet e saj për kthimin e Kosovës në “ENQA” dhe EQAR”.

Të buzëqeshur në dorëzim-pranimin e detyrës, u shfaqën Ministri i ri Shëndetësisë, Arben Vitia dhe paraardhësi Uran Ismajli. Vitia theksoi se shëndetësia do të jetë prioritet e Kurtit.

Edhe ish ministrja e bujqësisë Dijana Ziviq i dorëzoi mandatin ministrit  të ri Besian Mustafës. Ky i fundit tha se do të jetësoi të gjitha premtimet.

Detyrën e re si ministër i brendshëm e pranoi edhe Agim Veliu, nga ish ministri Ekrem Mustafa si dhe ai i Administratës Publike Mahir Yagcilar. Pasi kjo e fundit do të shkrihet në të parën.

Gjithashtu Ministri i deritanishëm i Mjedisit Fatmir Matoshi, zyrtarisht i dorëzoi detyrën ministrit të ri Lumir Abdixhikut.
Ndërkaq dorëzim-pranimi në Ministrinë e Kulturës në mes Vlora Dumoshit dhe Kujtim Gashit do të bëhet të mërkurën./RTV Dukagjini/