Gjermania nuk i dëgjoi paralajmërimet për Rusinë, thotë Annalena Baerbock

Pushtimi rus i Ukrainës ka ndryshuar mënyrën se si Gjermania e sheh sigurinë dhe e bëri Berlinin të kuptojë se dështoi kur nuk dëgjoi aleatët e Evropës Lindore, të cilët paralajmëruan për kërcënimet nga Moska, ka shkruar në The Guardian, Annalena Baerbock, ministrja e jashtme gjermane.

Në një pranim të sinqertë për të metat në politikën e jashtme gjermane të pasluftës, ajo tha se vendet në Evropën Lindore kishin të drejtë të paralajmëronin Gjermaninë se shpresa për më të mirën në trajtimin e kërcënimeve nga një Rusi autokratike nuk ishte një përgjigje adekuate, shkruan më tej mediumi britanik, përcjell Telegrafi.

Për një kohë të gjatë, tha ajo, Gjermania kishte përdorur “diplomacinë e çeqeve”, ose besimin se ndërveprimi politik dhe ekonomik do ta çonte Rusinë në një rrugë demokratike.

“Ne e dimë se për një të ardhme të parashikueshme, Rusia e presidentit (Vladimir) Putin do të mbetet një kërcënim për paqen dhe sigurinë në kontinentin tonë dhe se ne duhet të organizojmë sigurinë tonë kundër Rusisë së Putinit, jo me të”, tha ajo.

Duke shkruar përpara samitit të NATO-s në Vilnius dhe menjëherë pas publikimit të një strategjie të re të sigurisë kombëtare gjermane, ajo ndërthuri interesat e sigurisë së Gjermanisë me ato të Evropës Lindore, duke thënë: “Ne gjermanët nuk do të harrojmë kurrë se lirinë tonë në një vend të ribashkuar ua detyrojmë gjithashtu aleatëve tanë dhe fqinjëve tanë lindorë. Ashtu si ata ishin aty për ne, ne do të jemi aty për ta tani, sepse siguria e Evropës Lindore është siguria e Gjermanisë”.

Siç vë në pah The Guardian, ka pasur dyshime nëse Gjermania mund të merrte një rol udhëheqës ushtarak në Evropë duke pasur parasysh historinë e saj, por Baerbock tha se lufta në Ukrainë e kishte detyruar Gjermaninë, ndonjëherë për habinë e saj, të rivlerësonte rolin dhe përgjegjësitë e saj.

“Pas tmerreve të Luftës së Dytë Botërore, të shkaktuara nga gjermanët, politika e jashtme e vendit tonë u drejtua nga premisa se lufta nuk duhet të burojë më kurrë nga toka gjermane”.

Por ajo e kishte të qartë se kjo kishte ndryshuar: “Vetëm dy vjet më parë, ideja që Gjermania të dorëzonte tanke, sisteme të mbrojtjes ajrore dhe obusë në një zonë lufte do të ishte dukur e largët, për të thënë të paktën. Sot, Gjermania është një nga furnizuesit kryesorë të armëve për vetëmbrojtjen e Ukrainës”.

Në artikullin e saj, Baerlock vuri në dukje gjithashtu shpejtësinë me të cilën Gjermania kishte këputur lidhjet e saj ekonomike me Rusinë, sidomos duke vënë në dukje “eliminimin e kontributit të karburantit fosil rus në energjinë gjermane”. /Telegrafi/