Fotografia që u bë hit, por jo për atë që po mendoni (Foto)

Udhëtari brazilian Nelson Felippe u “nervozua” shumë, pasi u bë dëshmitar i një skene në një stacion treni.

Ndjenjat e tij ai vendosi që t’i ndajë me miqtë, duke realizuar një fotografi për të shprehur mosmiratimin në rrjetin social “Facebook”. Fotografia u bë hit dhe u shpërnda 100,000 herë brenda 24 orëve.

Imazhi është kapur në një platformë treni në Rio de Janeiro, ku dy femra të përqafuara shohin njëra-tjetrën në sy, por burimi i zemërimit të tij bëhet i qartë përmes postimit, ku me zgjuarsi vë në dukje qëndrimet konservatore të njerëzve.

“Nuk jam tip që paragjykoj, secili mund të bëjë çfarë të dojë në jetën e tij. Por kjo skenë është absurde dhe unë jam i detyruar për ta dëshmuar. Çfarë bëni në mënyrë private është puna juaj, por nëse e bëni në publik më shqetëson dhe mua. Unë refuzoj që të shoh një skenë si kjo dhe ta konsideroj atë si normale. Çfarë shembulli po japim për fëmijët? Çfarë i shkon në mendje një fëmije që sheh këtë gjë çdo ditë? Fëmijët do mendojnë se është normale të presësh metronë, duke qëndruar tek vija e verdhë. Prandaj fëmijë, mos u sillni si ai djaloshi atje, që rri mbi vijën e verdhë. Ndiqni shembullin e vajzave.
Prisni për metronë përpara vijës së verdhë. Më pas afrohuni kur të hapen dyert”, shkruan në postim Felippe, raporton "Daily Mail".

Në fillim njerëzit e cilësuan si homofobik, por braziliani thjesht u sugjeronte ta lexonin deri në fund tekstin shoqërues të fotos.