Evropianët janë të hapur për anëtarësimin e Ukrainës në BE – tregon një sondazh përpara samitit kyç

Sipas një sondazhi, evropianët janë përgjithësisht të hapur ndaj idesë së anëtarësimit të Ukrainës në BE, pavarësisht kostove dhe rreziqeve.

Megjithatë, ata janë treguar “më pak në disponim” për zgjerimin e mundshëm të bllokut për të marrë edhe Gjeorgjinë dhe vendet e Ballkanit Perëndimor.

Ndryshe, Komisioni Evropian rekomandoi muajin e kaluar që bisedimet zyrtare të pranimit të fillojnë me Ukrainën dhe Moldavinë, përcjell Telegrafi.

Kështu, 27 krerët e qeverive të BE-së do të diskutojnë propozimin në një samit të Brukselit këtë javë – megjithëse kryeministri i Hungarisë, Viktor Orbán, ka thënë vazhdimisht se ai kundërshton hapjen e negociatave me Kievin.

Kujtojmë se zgjerimi është bërë një prioritet urgjent i BE-së që kur Rusia nisi luftën e saj kundër Ukrainës.

Komisioni në nëntor mbështeti gjithashtu bisedimet e hyrjes me Bosnje dhe Hercegovinën – pasi Sarajeva të jetë gati – dhe rekomandoi që Gjeorgjisë t’i jepej statusi i vendit kandidat.

Ministri i Jashtëm i Ukrainës, Dmytro Kuleba, tha të hënën se do të ishte “shkatërruese” për Kievin dhe BE-në nëse samiti nuk do të mbështeste fillimin e bisedimeve të pranimit.

“Nuk mund ta imagjinoj… as nuk dua të flas për pasojat”, tha Kuleba.

Sondazhi i gjashtë vendeve anëtare të BE-së për Këshillin Evropian për Marrëdhëniet me Jashtë (ECFR), gjeti mbështetje të konsiderueshme për kandidaturat e Ukrainës dhe, në një masë më të vogël, të Moldavisë dhe Malit të Zi, por edhe shqetësime të thella ekonomike dhe të sigurisë.

Sondazhi gjeti mbështetje për hyrjen e Ukrainës, më të lartë në Danimarkë (50%) dhe Poloni (47%), me opinion afërsisht të ndarë në Rumani (32% pro, 29% kundër), Gjermani (37% pro, 39% kundër) dhe Francë (29% pro, 35% kundër). Austria ishte 52% kundër.

Megjithatë, 45% e të anketuarve ishin të shqetësuar se pranimi i Ukrainës do të kishte një ndikim negativ në sigurinë e BE-së, kundrejt 25% që mendonin se do ta përmirësonte atë, ndërsa 39% besonin se hyrja e Kievit do të ndikonte negativisht në sigurinë e vendit të tyre.

Veç kësaj, shumë evropianë nuk panë asnjë përfitim ekonomik nga anëtarësimi i Ukrainës. Ndërsa 43% e të anketuarve në Poloni dhe 37% në Rumani panë një ndikim pozitiv për ekonominë e BE-së, 54% në Danimarkë dhe 46% në Austri parashikuan një kosto. /Telegrafi/