Deri në fillim të vitit të ardhshëm: Qeveria britanike planifikon 10 milionë testime ditore për coronavirus

Revista mjekësore britanike, BMJ njoftoi se qeveria e Mbretërisë së Bashkuar po punon rreth një plani, i cili do të rrit numrin e testimeve të coronavirusit në një nivel të paimagjinueshëm.

Në fakt, planifikon të kryejë 10 milionë testime çdo ditë deri në fillim të vitit të ardhshëm, si pjesë e një zgjerimi të madh të programit kombëtar të testimit.

Duke cituar dokumente zyrtarë, revista mjekësore njoftoi se qeveria është e gatshme të shpenzojë rreth 141 miliardë euro për një testim të tillë me qëllim të “mbështetjes së aktivitetit ekonomik dhe kthimit në jetën normale”, transmeton Telegrafi.

Një memorandum që BMJ mori për inspektim, në lidhje me të ashtuquajturin “Operacioni Hëna”, iu dërgua kryeministrit të Skocisë, Nicola Sturgeon dhe ministrave të saj, ku parashikohej se zbatimi i këtij plani do të kushtonte “më shumë se 100 miliardë euro”.

Lexo po ashtu Britania e Madhe ndalon tubimin e më shumë se gjashtë personave, por ka disa përjashtime: Nga funeralet deri te shkollat

Nëse ky plan realizohet, do të thotë që e gjithë popullsia e Britanisë së Madhe mund të testohet çdo javë.

BMJ gjithashtu kishte një pasqyrë në prezantimin e përgatitur për qeverinë britanike nga kompania e konsulencës “Boston Consulting Group”, e cila tregon se plani parashikon që kapacitetet aktuale të testimeve ditore të rriten nga 350 mijë në dhjetë milionë deri në pjesën e parë të vitit 2021. /Telegrafi/