Coronavirusi ka shkaktuar tri herë më shumë vdekje në Britani të Madhe, sesa gripi dhe inflamacioni i mushkërive së bashku

Sipas një hulumtimi të kryer së fundmi në Britani të Madhe, coronavirusi ka shkaktuar tri herë më shumë raste të vdekjeve sesa gripi sezonal dhe pneumonia dhe inflamacioni i mushkërive, shkruan Sky News.

Të dhënat e Zyrës së Statistikave Kombëtare të Britanisë së Madhe (ONS), tregojnë se nga janari deri në gusht – në Angli dhe Wales janë shënuar 13.619 viktima për shkak të inflamacionit të mushkërive dhe 394 tjerë nga gripi sezonal, transmeton Telegrafi.

Në anën tjetër, nga marsi i këtij viti nga COVID-19 kanë humbur jetën më shumë se 48 mijë qytetarë të Britanisë së Madhe.

“Nga viti 1959 kur ONS filloi me evidentimin e rasteve të vdekjes – e deri më sot, numri i viktimave nga gripi dhe inflamacioni i mushkërive në tetë muajt e parë ka qenë më i vogël sesa nga COVID-19”, ka deklaruar Sarah Caul që kryen analizat e rasteve të vdekjeve pranë ONS-së.

Në shtëpitë e pleqve që në veçanti janë goditur nga pandemia, rasti i vdekjeve nga COVID ka qenë pothuajse dy herë më i madh krahasuar me numrin e vdekjeve nga gripi dhe inflamacioni i mushkërive. /Telegrafi/