City i pandalshëm, turpëron Arsenalin dhe i largon kokulur ‘Topçinjtë’ nga stadiumi (Video)

Manchester City ka vazhduar shkëlqimin në Ligën Premier, derisa ka mposhtur për herë të dytë brenda pesë ditëve Arsenalin me rezultat 0-3.

Ndeshja filloi me interesim të vogël nga londinezët të cilët si rrallë herë më parë nuk e kishin mbushur stadiumin ‘Emirates’.

E të dëshpëruar nga klubi i tyre i zemrës Arsenal, tifozët londinez u dëshpëruan edhe në takimin e sontëm ndaj Manchester Cityt.

Vetëm 15 minuta i mjaftuan skuadrës së Pep Guardiolës për ta zhbllokuar rezultatin në 0-1.

Ishte mesfushori portugez Bernardo Silva që me një gjuajtje të fortë dhe precize shënoi nga distanca për 0-1.

Goli i dytë nuk vonoi dhe erdhi 13 minuta më vonë nga ‘Citizens’.

Një aksion i bukur u ndërtua mes Leroy Sane dhe Kun Aguero që asistoi për David Silven i cili me lehtësi shënoi për 0-2.

Kur të gjithë po prisnin reagimin e vendasve ndodhi e kundërta.

City arriti ta shënoj edhe golin e tretë pas një kundërsulmi të shpejtë.

Kyle Walker asistoi bukur nga krahu i djathtë për Leroy Sanen i cili pa problem shënoi në portën e zbrazur për 0-3.
Pas golit të tretë të mysafirëve, shumë nga tifozët vendas u larguan kokulur nga stadiumi dhe të dëshpëruar me paraqitjen e skuadrës së tyre.

Me epërsinë prej tre golave të Cityt përfunduan 45 minutat e para të ndeshjes.

Arsenali kishte mundësinë të rikthehet në lojë por sulmuesi i transferuar në janar, Pierre Emerick Aubameyang gaboi nga pika e bardhë në minutën e 52-të.

Fitorja ndaj Arsenalit ka bërë që City ta thellojë epërsinë ndaj Liverpoolit në 16 pikë.

Ekipi i Pep Guardiolës ndodhet në pozitën e parë në tabelë me 75 pikë të grumbulluara pas 28 javëve dhe me gjasa shumë të mëdha për ta fituar titullin e Anglisë.

Ndërkohë Arsenali pas kësaj humbje ia vështirëson edhe më shumë punët vetës për të arritur pozitën e katërt që i dërgon në Ligën e Kampionëve. /Telegrafi/

http://www.dailymotion.com/video/x6fhd1c

https://www.youtube.com/watch?v=mUJO-QDIy0o

http://www.dailymotion.com/video/x6fhdae