Burrë e grua nga Rahoveci vdesin brenda dy ditësh nga COVID-19

Të dielën, një 70 vjeçar nga fshati Pataqan i Epërm i Rahovecit, i infektuar me COVID-19, ka ndërruar jetë. Ndërkaq, vetëm dy ditë më parë nga po ky virus ka ndërruar jetë edhe bashkëshortja e të ndjerit.

Kjo u bë e ditur nga kreu i Komunës së Rahovecit, Smajl Latifi.

“Gruaja ka vdekur dy dite më parë, më 21 gusht, ka qenë 68 vjeçare ndërsa sot ka ndërruar jetë bashkëshorti i saj 70 vjeçar, të dy kanë qenë të konfirmuar me COVID-19”, ka thënë ai, për klanks.

Latifi ka njoftuar se, viktimat kanë ndërruar jetë në Spitalin e Gjakovës, burri do të varroset sot në 19:30.

Lexo po ashtu Tre vëllezërit Ymeri vdesin nga COVID-19 brenda një muaji

Ndërkaq coronavirusi shkaktuar një tragjedi shumë të rëndë edhe në familjen Ymeri nga Ferizaj.

Tre vëllezërit Ferat, Murat dhe Berat Ymeri kanë vdekur brenda një muaji, pasi nuk kanë arritur të shërohen pas infektimit nga coronavirusi.

Këtë e ka bërë të ditur deputeti i Lëvizjes Vetëvendosje Hekuran Murati që të ndjerit i kishte familjarë.

“Tre vëllezër, kushëri të babit, të cilët virusi i mori brenda një muaji. Tre njerëz të urtë e punëtorë, ashtu siç përshkruhen nga secili që i ka njohur. Virusi tashmë është kthyer në tragjedi për shumë familje. Sepse viktimat nuk janë vetëm statistika, por janë persona me emër e mbiemër, familjarë e prindër të dikujt. Fjalët ngushëlluese në një tragjedi të tillë e humbin efektin. Krejt çka mund të bëjmë është të lutemi që familjet të gjejnë forcën për ta përballuar këtë situatë, me shpresën që do të vazhdojnë t’i kujtojnë veprat e mira të më të dashurve të tyre. Pushoni të qetë kusho”, ka shkruar Murati.

Instituti Kombëtar i Shëndetësisë Publike të Kosovës (IKSHPK) njoftoi të dielën se dhjetë persona kanë vdekur dhe janë regjistruar 111 raste të reja me COVID-19, sëmundjen që e shkakton coronavirusi.

Lexo po ashtu Dhjetë të vdekur në 24 orët e fundit - 111 raste të reja dhe 159 të shëruar nga COVID-19

Shifrat e reja të të infektuarve dalin pas testimit të 448 mostrave.

Numri i përgjithshëm personave që kanë vdekur me coronavirus në Kosovë ka arritur në 467.

Që prej 13 marsit – kur u regjistruan rastet e para me koronavirus në Kosovë – e deri më 23 gusht, në Kosovë janë 12,448 janë infektuar me koronavirus.

Prej tyre, 8,505 pacientë janë shëruar dhe 3,476 raste vazhdojnë të jenë aktive./Telegrafi/