Burdushi: Nuk po diskriminohem në baza etnike, thjeshtë jam viktimë e politikës

Zyrtarë të Këshillit për Mbrojtjen e të Drejtave dhe Lirive të Njeriut, Qendra Rajonale në Prizren, të martën vizituan Hysri Peqanin-Burdushin, në Qendrën e ndalimit në Prizren, që ka hyrë në grevë tash e 48 orë.

Sipas drejtorit të Qendrës së Paraburgimit në Prizren, Hamit Ademaj, ndaj Hysri Peqanit, janë duke u zbatuar gjithë rregullat e parapara në të tilla raste, duke qenë në vëzhgim permanent.

“Ai, është në gjendje stabile dhe jemi duke e përcjellë gjendjen e tij shëndetësore, duke qëndruar i vetëm në qeli, ashtu siq edhe parashihet në të tilla raste”, ka thënë ai, citon KMDLNj.

Ndërkaq, punëtori social, po ashtu ka pohuar se e ka takuar dhe këshilluar të njëjtin (Burdushin) për ndërprerje të grevës, por ai akoma vazhdon të jetë në grevë.

“Gjatë takimit/vizitës që i bëri KMDLNJ-ja, Burdushi ka pohuar se është i indinjuar me sjelljen, përkatësisht zvarritjen e procesit dhe greva në këtë rast s’ka të bëjë me trajtimin në Qendrën e Paraburgimit në Prizren, për të cilët thotë: ‘se janë shumë korrektë dhe i falënderon menaxhmentin dhe oficierët korrektues, personelin e stafin mjekësor, për trajtim shumë të mirë”, thuhet në njoftim.

Por, ai ka vërejtje në zvarritjen e procesit nga Prokuroria shtetit, dhe për këtë ka hyrë në greve, siç thotë deri në realizimin e të drejtës për gjykim të shpejt e të drejtë, duke konsideruar veten të pafajshëm.

“Nga ana e vetë KMDLNJ i ka kërkuar Burdushit, që të ndërpresë grevën, ngase me këtë vetëm mund të dëmtojë shëndetin. Ndërsa, sa i takon adresimeve për zvarritje nga Prokuroria, kjo s’është në mandatin e KMDLNJ-së. Gjatë kësaj vizite, Hysri Peqani, ka konfirmuar për KMDLNJ-në se: ‘në asnjë moment dhe asnjë rrethanë nuk ndien se po diskriminohet në baza etnike. Kjo është e pavërtetë që ka dalë, nuk e di nga kush. Unë, këtë asnjëherë se kam thënë dhe as që e them. Unë, jam i martuar me shqiptare. Kjo nuk është e vërtetë, se ka prapavijë etnike. Thjeshtë po mbahem padrejtësisht dhe këtë dua sa më parë ta dëshmojë para drejtësisë, se jam thjeshtë viktimë e politikës’”, thuhet në njoftim.

Ai, u arrestua më 16.11.2018 në shtëpinë e tij në Prizren. Policia gjatë bastisjes (ka bastisur dy shtëpitë e tij) ka marrë me vete materiale si:DVD, incizime tjera, ka konfiskuar kamerat, hard disqe si dhe tri vetura pronë e tij dhe familjes, të markave:Ronger, Audi e Reno’.

Ai, ka thënë se veprimtaria e tij është legale, mjekësi sociale (85/14), këshillëdhënëse, nga e cila posedon dokumentacionin për trajtimin e secilit që ka kërkuar ndihmë tek ai. /Telegrafi/