Brenda dhomës së torturimit, aty ku rusët i varrosën për së gjalli civilët ukrainas – ua merrnin protezat e dhëmbëve të arit

Policia ukrainase ka njoftuar se ushtria e këtij vendi pas çlirimit të fshatit Piski-Radkivski në rajonin e Kharkivit, ka gjetur dhomën në një bodrum të një shtëpie private ku rusët kanë torturuar ushtarët dhe civilët ukrainas.

Detaje për këtë janë gjetur brenda dhomës dhe fotografitë nga ajo i publikoi Sergei Bolvinov, një prej zyrtarëve të lartë të policisë në rajonin e lartcekur, transmeton Telegrafi.

“Fqinjët vazhdimisht kanë dëgjuar britma. Hetuesit në fshat gjetën dhomën për torturim. Pas çlirimit të rajonit, policia ka pranuar informacione për bashkëpunëtorë, krimet e ushtrisë ruse si dhe dëshmitë e banorëve lokalë. Pas çlirimit të fshatit Piski-Radviski, banorët i janë drejtuar policisë, ku raportua se ushtria ruse në bodrumin e një shtëpie ka mbajtur të burgosur – banorë lokalë, ushtarët ukrainas”, thuhet në kumtesën e policisë ukrainase.

Policia ukrainase është e informuar edhe për varrimin për së gjalli të njerëzve dhe përdorimin e maskave të gazit – pra helmimin e civilëve.

Në dhomën e torturimit janë gjetur lodra seksi, kuti me proteza të dhëmbëve të arit, tela gjembor dhe letra e intervista nga disa burra që kishin qenë atje.

Policia i di emrat e ushtarëve ukrainas që rusët i kanë keqtrajtuar. Hetuesit dhe gjykata po punon në konfirmimin e të gjitha ngjarjeve që kanë ndodhur në këtë “qendër” torturimi. /Telegrafi/