Berisha: Termi “korrigjim i kufijve” përdoret nga Beogradi dhe argatët e tij në Prishtinë

Ish-kryeministri i Shqipërisë, Sali Berisha ka shkruar sot se termi “korrigjim kufijsh” është produkt i kuzhinës së Beogradit, ndërsa nënkupton që katër komunat në veri, Mitrovica e Veriut, Zveçani, Leposaviqi dhe Zubin Patoku t’i kalojnë Serbisë.

Berisha këto komente i bëri në rrjetin social Facebook, duke thënë se termi “korrigjim i kufijve” përdoret nga Beogradi dhe argatët e tij në Prishtinë.

Lexoni të plotë postimin e Berishës në Facebook:

“Termi ‘korrigjim kufijsh’ midis Kosovës dhe Serbisë, është thjesht produkt i kuzhinës së Beogradit!

Të dashur miq, këtu me poshtë keni një dokument të kuzhinës së Beogradit, në të cilën flitet jo për ndarje apo copëtim të territorit të Kosovës por për korrigjim të kufijve midis Serbisë dhe Kosovës si dhe për marrëveshje win-win midis këtyre dy vendeve. Sipas këtij dokumenti:

1- “korrigjimi” i kufijve, term që përdor sot Beogradi dhe argatët e tij ne Prishtine, nënkupton as me shumë dhe as më pak se sa t’i kalojnë Republikës së Serbisë katër komuna, konkretisht Mitrovica e Veriut, Zveçani, Leposaviqi dhe Zubin Patoku.

2- Kjo, sipas kuzhinës së Beogradit do të ishte një marrëveshje win-win, pra që do të fitonin të dy palët.

3- Në firmosjen e kësaj marrëveshje duhet të jetë Edi Rama! Mendoj se ky dokument nxjerr lakuriq argatët e Beogradit që përpiqen të mashtrojnë shqiptarët me spekulime semantike të përgatitura në kuzhinën e kryeqendrës së Serbisë dhe të servirura në takime obskure të argatëve të saj shqipfolës albanofob. /Telegrafi/