Bekteshi: Fillon realizimi i gjashtë masave nga Pakoja e katërt

Ministri i Ekonomisë, Kreshnik Bekteshi thotë se ka nisur realizimi i gjashtë masave në kuadër të Ministrisë së Ekonomisë nga paketa e katërt e masave ekonomike të Qeverisë për rivitalizimin dhe rinisjen e ekonomisë në kushte të COVID-19.

“Me vendim të Qeverisë, Ministria e Ekonomisë do të transferojë 60,000,000 denarë, pra 1 milion euro në një llogari të veçantë të caktuar të Bankës për Zhvillim të Maqedonisë së Veriut, e cila do të mundësojë fillimin e realizimit të një linje kredie pa interes për kompanitë mikro dhe të vogla të mesme nga Pakoja e katërt e masave ekonomike të Qeverisë për përballje me pasojat e Kovid-19”, ka shkruar Bekteshi.

Kjo linjë kredie, tha ai, do të lansohet me një grant nga Bashkimi Evropian përmes Bankës për Zhvillim në kuadër të masave për rivitalizimin dhe rifillimin e ekonomisë në kushte të virusit Kovid-19.

“Në seancën e sotme të Qeverisë u miratuan edhe dy programe në kuadër të Ministrisë së Ekonomisë për mbështetjen e turizmit nga Pakoja e katërt e masave. Me këto dy programe fillon zbatimi i pesë masave nën kompetencën e Ministrisë së Ekonomisë për mbështetje të sektorit të turizmit. Bëhet fjalë për këto masa: Kthimi i tarifës së paguar të qëndrimit të përkohshëm për vitin 2019 në të gjitha objektet e kategorizuara hotelierike, Grante për agjenci udhëtimi të licencuara, Grante për udhëzues të licencuar turistikë, Grante për restorantet e dasmave, Grantet për këndet e lojërave”, tha Bekteshi

Vlera totale e dy programeve të mbështetjes së turizmit është 459,650,000 denarë.

“Pas publikimit të Programeve në Gazetën zyrtare, Ministria e Ekonomisë do të shpallë thirrje publike në të cilat mund të aplikojnë të gjithë individët dhe personat juridikë”, theksoi Bekteshi.