Banka Botërore: Mesatarisht dy mijë euro, rreth 174 mijë familje morën para nga emigrantët

Teksa ka pakësuar dhe plakur popullsinë, emigracioni i lartë duket se ka edhe një anë pozitive.

Të ardhurat e konsiderueshme që emigrantët shqiptarë sjellin në atdhe dhe që janë një burim i rëndësishëm për jetesën e mijërave familjeve në vend dhe ekonominë.

Banka Botërore evidenton se shumat që kanë ardhur në Shqipëri nga emigrantët janë gati dyfish më të larta se ato që deklarohen zyrtarisht nga Banka e Shqipërisë.

Sipas raportit të fundit të institucionit financiar ndërkombëtar, cdo familje ka marrë mesatarisht 2 mijë euro, ndërkohë që totali i remitancave gjatë vitit 2023 arriti në rreth 1.9 miliardë euro. Përfituese kanë qenë 174 mijë familje ose 23% e totalit të familjeve në vend dhe këto të ardhura kanë qenë 18% e të ardhurave familjare.

Flukset valutore të remitancave kanë qenë të larta gjatë gjithë vitet e fundit, duke dëshmuar për emigrimin në masë të shqiptarëve.

Sipas Bankës së Shqipërisë, në vitin 2023, dërgesat e emigrantëve arritën rekordin e 929 milionë eurove. Këto flukse valutore janë përshpejtuar veçanërisht në katër vitet e fundit, që tregon për aktivizimin intensiv të emigrimit dhe faktit që janë emigrantët e rinj ata që po dërgojnë para në atdhe.

Por si paraqitemi ne krahasuar me vendet e rajonit?

Pesha që remitancat kanë në ekonominë tonë vlerësohet sa 9.2% e Produktit të brendshëm bruto.

Me këtë shifër ne renditemi në mesin e vendeve të rajonit, ndërkohë që Kosova është shteti që kryeson dhe ku remitancat japin kontributin kryesor në ekonomi me 17.2%.

Por për çfarë shërbejnë këto para që dërgohen në atdhe?

26% e familjeve shqiptare jetojnë me këto të ardhura, duke dhënë një ndikim të konsiderueshëm në konsumin e brendshëm.

Këto para investohen në biznese të vogla, në blerje pasurish të patundshme, ndërkohë që një pjesë shkon edhe si kursim. Por remitancat kanë një efekt negativ, që është dekurajimi i punësimit.