Ballkani me letër të hapur për Presidentin dhe Kryeministrin e Kosovës: Futbolli është i okupuar

Ballkani ka lëshuar një letër të hapur befasuese, aty ku ka përfshirë Presidentin, Kryeminsitrin dhe Ministrin e Kulturës, Rinisë dhe Sportit.

Klubi nga Theranda është i acaruar me situatën që gjendet futbolli kosovar, pasi dyshohet sipas tyre se ndeshjen janë të kalkuluara më herët.

Në letrën e Ballkanit, tregohet se si edhe tifozët e dinë për një rezultat të takimit, ende pa u luajtur ajo.

Skuadra nga Suhareka ka kërkuar një intervenim sa më të shpejtë dhe sipas tyre të lirohet futbolli nga okupimi.

Letra e plotë (pa ndërhyrje) e Ballkanit:

Letër e hapur

Për: ​​Presidentën e Republikës së Kosovës

​​Kryeministrin e Republikës së Kosovës

​​Ministrin e Kulturës, Rinisë dhe Sportit

Cc:​​Kushdo që është i interesuar

Tema: ​​Kampionati i Kosovës në Futboll – Superliga

Të nderuar/a,

Pa asnjë fije dyshimi konsiderojmë që secili qytetarë i Republikës së Kosovës është gëzuar me faktin që futbolli vendor u anëtarësua në FIFA dhe UEFA, duke shpresuar se përfundimisht futbolli i Kosovës po dilte nga mjerimi ku kishte mbetur si rezultat i okupimit.

Fatkeqësisht kjo shpresë rezultoi e dështuar për arsye se përveç problemeve të okupimit dhe të mos inkuadrimit në mekanizma ndërkombëtarë, tani jemi duke u ballafaquar me mos zhvillimin, pengimin apo thjesht shkatërrimin e futbollit në Kosovë, deshëm apo nuk deshëm ta pranojmë, fajtorë janë vet faktorët e futbollit kosovar.

Si është e mundur që për vite me radhë në futbollin e Kosovës, ose më saktë në përfundim të çdo sezoni të futbollit qoftë në garat e kampionit apo të kupës, opinioni më tepër merret me kalkulime matematikore sesa me futboll të vërtetë. A jemi ne duke luajtur futboll, apo jemi duke bërë “matematik“, sepse ne si klub jemi regjistruar në FFK për të luajtur futboll, e jo për të bërë “kalkulime”.

Si është e mundur që opinioni të dijë, e me javë para ndeshjes dinte si do të përfundonte ndeshja. Cili klub cilit klub tjetër po ia lëshon lojën, cili klub e lëshon kupën për kampionat, e cili klub e lëshon kampionatin për kupë etj.

Mjafton të hysh në faqet zyrtare të klubeve dhe këtë fenomen e vëren nga vet tifozët e klubeve gjegjëse, fatkeqësisht në krejt këtë maskaradë janë të përfshirë disa klube, disa mbetje politike dhe FFK, kjo e fundit në mënyrë mjeshtërore kryen punën e sajë duke vendosur cili klub do bëhet kampion, e cili do ta fitojë kupën, si dhe cili do mbetet pa asgjë.

Mjafton t’i shohim vetëm ndeshjet e muajit të fundit në kupë dhe të kampionatit që të arrijmë në përfundimin se futbolli në Kosovë ka degraduar në çdo aspekt.

Prandaj i lusim të lartshënuarit dhe mekanizmat ligjorë të fillojnë të merren më këtë çështje sa nuk është bërë vonë, kjo për hir të rinisë kosovare dhe investimeve të mëdha të cilat po i bëjnë investitorët me djersen e tyre. /Telegrafi/