Balerinët kosovarë u kthyen me medalje nga Italia

Gjatë muajit mars kur koreografi arbëresh, Antonio Pio Fini, kishte realizuar shfaqjen e baletit “Aty ku bie drita”, me Trupën e Baletit të Kosovës në Teatrin Kombëtar të Kosovës, i kishte thënë drejtorit të Baletit, Ahmet Brahimaj, se do t'i ftonte këta të fundit si mysafirë specialë në festivalin ndërkombëtar “Alto Jonio Dance Festival” të Italisë.

Fini e mbajti fjalën. Në mëngjesin e së enjtes, pas qëndrimit prej pesë netësh në Itali, stafi i balerinëve të Kosovës, që kishte shkuar të japë shfaqje për herë të parë në Itali, është kthyer në Prishtinë. Ky festival është mbajtur në tri qytete të vjetra italiane, në atë të Villapianos, Altomontes dhe në Crotone.

Shfaqja “Coppelia” e realizuar nga koreografi Ilir Kerni ishte e para e dhënë nga trupa e Baletit të Kosovës në qytetin e Villapianos në Kalabri. Ndërsa dy shfaqjet tjera “Aty ku bie drita” e Finit dhe “Dasma” e realizuar nga koreografi turk Mehmet Ballkan janë shfaqjet që balerinët kosovarë kanë performuar atje.

Trupa e Baletit të Kosovës nuk e pati problem të shkonte nga Prishtina në Kalabri, ngase në ndihmë u erdhi ambasada italiane në Kosovë, që përveç lëshimit pa problem të vizave për balerinët, kjo ambasadë u doli në ndihmë edhe me të holla. “Kam kënaqësi të falënderoj ambasadën italiane për mundësinë e dhënë dhe për kushtet e ofruara”, ka thënë drejtori i Baletit të Kosovës, Ahmet Brahimaj.

Pagesat që ka bërë drejtoria e Baletit të Kosovës kanë qenë ato të shpenzimeve të rrugës dhe të hotelit, që sipas Brahimajt, paga ditore për secilin balerinë ka qenë 40 euro duke përfshirë edhe të gjitha shpenzimet që i ka hequr kjo drejtori.

Mirëpo, Brahimaj ka thënë se mjetet që janë “prekur” për shpenzime të balerinëve, më shumë se gjysma e tyre do të kthehet përsëri në llogarinë bankare, ngase këto shpenzime i ka hequr edhe zëvendëskryeministri i Kosovës Behxhet Pacolli, si ndihmë vetjake dhe një pjesë e shpenzimeve ka ardhur nga një donacion nga Amerika. “Ato që na kanë tepruar sot (e premte) i kam kthyer përsëri në bankë e do t’i ruajmë për shfrytëzim të mëtutjeshëm në përgatitje të shfaqjeve tjera të cilat do të fillojnë së përgatituri në muajin shtator”, është shprehur drejtori Brahimaj.

Për suksesin e arritur nga balerinët kosovarë, Ahmet Brahimaj thotë se nuk e ka besuar që pritja e udhëheqësve të festivalit “Alto Jonio Dance Festival”, do të jetë në atë nivel. “Është e vështirë të shpjegohet se çfarë atmosfere është bërë në atë sallë, e në momentin kur ka filluar shfaqja “Aty ku bie drita”, kjo shfaqje nis me tingujt e muzikës “…Vajta kalova gjithë Kalabrinë…”, e në ato momente nis të këndojë edhe publiku, e kjo është e papërshkrueshme”, shprehet Brahimaj.

Një e veçantë e këtij udhëtimi është dhënia e çmimit të karrierës për drejtorin e Baletit të Kosovës, Ahmet Brahimaj, nga ky festival. /Zëri/