AAK: Shtyrja e vendimit, përpjekje për mënjanimin politik të Haradinajt

Aleanca për Ardhmërinë e Kosovës, shtyrjen edhe për një muaj të vendimit ndaj Ramush Haradinajt, e ka quajtur vendim të palogjikshëm dhe krejtësisht i pakuptueshëm.

Sipas një njoftimi për media AAK ka theksuar se dyshon se shtyrja e vendimit për për lirimin e Haradinajt, është përpjekje e drejtpërdrejtë për mënjanimin politik të tij.

Njoftimi i plotë:

Shtyrja edhe për një muaj e mbajtjes së Ramush Haradinajt në Francë, është abuzim me drejtësinë. Vendimi është i palogjikshëm, dhe krejtësisht i pakuptueshëm. Është e habitshme se si autoritetet gjyqësore të Francës, janë vënë në shërbim të ish bashkëpunëtorëve të Millosheviqit, të cilët përmes Haradinajt po e provokojnë rëndë stabilitetin dhe paqen në Kosovë.
AAK, dyshon se shtyrja e vendimit për lirimin e Haradinajt, është përpjekje e drejtpërdrejtë për mënjanimin politik të tij.
Ne jemi të bindur se Haradinaj do të lirohet, sepse të ashtuquajturat dëshmi të Serbisë kundër tij, janë trillime dhe shpifje ordinere, por autoritetet franceze duhet ta kuptojnë se drejtësia e vonuar është padrejtësi, dhe ato po e vonojnë drejtësinë në rastin Haradinaj. /Telegrafi/