Berisha nuk komenton vendimin e gjykatës për 21 Janarin

Kryeministri Sali Berisha nuk pranoi të komentoj vendimin e sotëm të gjykatës së Tiranës e cila i dha pafajësinë dy të akuzuarve të 21 Janarit. I pyetur nga mediat në lidhje me akuzat e familjarëve të viktimave të 21 Janarit, kryeministri Berisha i është përgjigjur prerë se nuk komenton vendimet e Gjykatës.

“Sot jam këtu për këtë çështje. Nuk do më gjeni të komentoj vendime gjykatash. Ky është një vend që ka sistemin e drejtësisë e akuzës. S`ka asnjë koment. Ju kërkova pyetje nëse keni të bëni me çështjen e fermerëve. Qëndrim im është i prerë”, tha Berisha
Ndërkohë, Kryeministri Sali Berisha informoi sot fermerët se Qeveria do të heqë TVSH-në për të gjitha makineritë e importuara dhe për kimikatet dhe plehrat kimike.

“Informoj fermerët se qeveria javën që vjen me një vendim të saj do të heqë TVSH për çdo lloj vegle, pajisje, makinerie të cilat kanë destinacion bujqësinë, blegtorinë apo biznesin e përpunimit ushqimor. Është një listë e gjatë prej rreth 110 artikujsh, makineri që përdoren në të gjithë spektrin e bujqësisë, blegtorisë të cilat do të importohen pa TVSH. Qeveria do të ndërmarrë nismën ligjore dhe do të dërgoj në parlament heqjen e TVSH për të gjitha llojet e kimikateve, plehrave kimike, substancave të ndryshme, fidanët, farërat që importohen për qëllime të zhvillimit të bujqësisë, pemëtarisë, blegtorisë dhe të gjithë sektorëve të kësaj fushe shumë të rëndësishme për qytetarët shqiptarë”, tha Berisha.

Sipas kryeministrit, kjo masë përbën mbështetjen më të fuqishme që fermeri shqiptar ka marrë nga qeveria në rrafshin fiskal gjatë këtyre 20 viteve. “Kjo krijon hapësira të reja për krijimin, konsolidimin e bizneseve të vogla bujqësore, blektorale në fshat. Kjo synon krijimin e një mjedisi të favorshëm dhe inkurajimin e çdo fermeri për ambicien më të madhe për konsolidimin e fermës së tij, për rritjen e prodhimit”, theksoi Sali Berisha. /Telegrafi/