Gjakovarët ndihen të fyer, kërkojnë shkarkimin e Jabllanoviqit: Fashizmi i Serbisë – nuk kalon! (Video)

Gjakova është prej qyteteve që pësoi më së shumti nga lufta. Rreth 800 persona u vranë dhe më shumë se 700 të tjerë rezultojnë të zhdukur.

Shumë gjakovarë u vranë nga vet fqinjët e tyre serbë, më të cilët kishin jetuar para lufte. Disa prej serbëve që nuk jetojnë në Kosovë e të cilët besohet se kanë qenë të përfshirë në kryerjen e krimeve, tentojnë të vijnë në Gjakovë çdo vit.

Këtë gjë kanë arritur ta parandalojnë edhe sivjet nënat dhe familjarët e atyre që humbën dhe u zhdukën në luftë.

Nysrete Kumnova që pos djalit ka të vrarë e të zhdukur të tjerë familjarë, deklarimin e ministrit Aleksandar Jabllanoviq e quan ofendim të rëndë. Por, jo vetëm nga Jabllanoviqi, por ndihet e fyer edhe nga kryeministri Isa Mustafa.

Kumnova thotë se institucionet kosovare do të duhej që vet t’ua ndalonin hyrjen kriminelëve e jo tua garantonin sigurinë.

E, derisa nënat e dëshmorëve dhe personave të zhdukur janë të zhgënjyera me Qeverinë, kryeministri Isa Mustafa e ka arsyetuar sërish Jabllanoviqin.

Në një postim në Facebook, Mustafa ka kërkuar uljen e tensioneve, mirëpo nuk ka përmendur asnjë masë ndëshkuese për ministrin serb të tij.

Kryeministri ka harruar të merret me Jabllanoviqin, ndërkohë që ka qortuar kritikuesit e tij, ndër ta edhe kryetaren e Gjakovës, Mimoza Kusari.

Qytetarët e Komunës së Gjakovës, nëpërmjet një proteste sot kanë kërkuar shkarkimin e ministrit për Kthim the Komunitete, Jabllanoviq, pas deklaratës së tij më 6 janar që i quajti egërsira protestuesit në Gjakovë.

Protestuesit kanë thënë se nëse kryeministri Mustafa nuk e shkarkon ministrin Jabllanoviq, ai duhet të japë dorëheqje.

Protesta zgjati rreth një orë dhe u paralajmëruan protesta masivë në Prishtinë.

Në mbështetje të protestës dhe kundër deklarimit të Jabllanoviqit është shprehur edhe Lidhja e Historianëve të Kosovës “Ali Hadri” dega në Deçan.

Historianët e Deçanit gjithashtu kërkojnë nga kryeministri i Kosovës Isa Mustafa, që të shkarkojë menjëherë nga detyra ministrin Jabllanoviq. /Koha/KTV/