Turistja amerikane hedh foshnjën e porsalindur nga dritarja e hotelit në Paris, arrestohet nga policia franceze

Një 18-vjeçare amerikane është në paraburgim nga policia franceze, pasi thuhet se hodhi për vdekje foshnjën e saj të porsalindur nga dritarja e një dhome hoteli në Paris të hënën herët në mëngjes.

Sipas Le Parisien, foshnja ende e kishte të lidhur kordonin e kërthizës. U dërgua me urgjencë në spital por nuk mbijetoi, transmeton Telegrafi.

Gruaja, emri i së cilës ende nuk është bërë i ditur nga policia franceze, u dërgua gjithashtu në spital për t’iu nënshtruar një operacioni pas lindjes.

Maylis de Roeck, zëvendësprokurorja përgjegjëse për komunikimin për zyrën e prokurorit publik të Parisit, tha për Newsweek se brigada e mbrojtjes së të miturve po ngarkohet të hetojë rastin si një vrasje e një të mituri nën 15 vjeç.

Ndërsa vrasja në Francë zakonisht dënohet me deri në 30 vjet burg, vrasja e dikujt nën moshën 15 vjeç dënohet me burgim të përjetshëm.

Foshnja thuhet se u hodh nga kati i dytë i një hoteli Ibis Styles në cepin e Rue des Réglises në Arrondissementin e 20-të të Parisit në orën 6 të mëngjesit, pak pasi lindi.

Policia u thirr në vendngjarje nga një dëshmitar, i cili tha se dëgjuan britma që vinin nga zona.

Një recepsioniste e hotelit Ibis Styles tha për Newsweek se nuk mund të diskutonte situatën.

Nëna thuhet se është pjesë e një grupi të rinjsh amerikanë që udhëtojnë nëpër Evropë. Ajo u vu në paraburgim në vendngjarje nga policia, ndërsa de Roeck tha për Newsweek: “Mundësia e një mohimi të shtatzënisë është duke u shqyrtuar”. /Telegrafi/