Në Prishtinë arrestohen tre shtetas të huaj, lëshuan çeqe pa mbulesë dhe keqpërdorën kartela bankare

Policia e Kosovës ka njoftuar se sot ka arrestuar tre persona të dyshuar për veprën penale lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit.

Në njoftimin e Policisë së  Kosovës thuhet se Drejtoria e Hetimit të Krimeve Kibernetike, pas veprimeve hetimore në bashkërendim me Prokurorinë e Shtetit si dhe me mbështetjen e njësive tjera relevante policore, ka zhvilluar kontrolle në tre lokacione të ndryshme në Prishtinë të cilat kanë rezultuar me arrestimin e tre personave të dyshuar.

“Lidhur me rastin personat e dyshuar  nga të cilët dy shtetas turq dhe një i Maqedonisë së Veriut dyshohet se me qëllim të përfitimit të kundërligjshëm të dobisë pasurore për vete apo personin tjetër, kanë keqpërdorur kartela bankare të shtetasve të huaj dhe POS terminale të bankave vendore, dhe me këtë rast të njëjtit kanë konsumuar veprën penale ‘Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit’”, thuhet në njoftim, transmeton Telegrafi.

Në lidhje me rastin në cilësi të provave materiale janë gjetur dhe sekuestruar POS terminale, kartela bankare, kartelë bankare e modifikuar, para të gatshme,  SIM kartela, vula me mbishkrime të bizneseve, kompjuter; telefona mobilë, si dhe dokumente relevante (fatura, kupona fiskal, etj.) që ndërlidhen me veprën penale.

Me vendim të prokurorit kompetent, tre të dyshuarit janë arrestuar dhe të njëjtit ndalohen për 48 orë, derisa rasti ndodhet në proces të mëtutjeshëm hetimor, thuhet në njoftim. /Telegrafi/