Ruben Amorim zbulon arsyen e vërtetë pse e përjashtoi Van Nistelrooy nga stafi i trajnerëve

Ruben Amorim ka folur për vendimin e tij për të përjashtuar Ruud Van Nistelrooy nga stafi i tij i trajnerëve para duelit të së premtes mes Manchester United dhe Leicester City në FA Cup. 

Van Nistelrooy, i cili iu bashkua stafit të trajnerëve të United verën e kaluar së bashku me asistentin e tij Rene Hake, mori përsipër rolin e trajnerit kur u shkarkua Erik Ten Hag në tetor pas një fillimi të dobët të sezonit. 

Tekniku holandez ishte në krye të Unitedit për katër ndeshje në të gjitha garat, duke qëndruar i pamposhtur me tri fitore dhe një barazim. 

Por, trajneri i ri Ruben Amorim vendosi që mos të ketë vend për Van Nistelrooy në stafin e tij, një vendim që e la ish-sulmuesi e Unitedit të lënduar dhe të zhgënjyer pas bisedimeve me teknikun portugez. 

Para këtij dueli, Ruben Amorim u pyet për vendimin e tij për largimin e Van Nistelrooy, përkundër përvojës së tij. 

“Nuk ishte një situatë e vështirë, sepse ishte e qartë për mua, unë vetëm duhej ta shpjegoja. Ai është një njeri i futbollit dhe e kupton këtë situatë. Unë e kam ekipin tim dhe stafin tim. Unë preferoj të punoj me skuadrën që më solli mua këtu”. 

Lexo po ashtu Klubet e Ligës konsiderojnë reduktimin e afateve të transferimeve

“Mund ta mbaja Ruud sepse ishte një gjë e mirë për mua , por nuk do ta vendosë Ruud përpara njerëzve të mi, pa marrë parasysh”. 

“Pastaj u desh që unë ta vendos një person si Ruud në fund të hierarkisë në stafin tim dhe mendoj se kjo nuk ishte e drejtë për të”. 

“Për të shfaqur respekt për Ruud, unë isha i qartë me të. Ia shpjegova se kam skuadrën time dhe se do të vazhdojë në të njëjtën mënyrë”, ka thënë Amorim./Telegrafi/