Derdhje nafte në Detin e Zi, autoritetet në Krime shpallin gjendjen emergjente

Zyrtarët e emëruar nga Rusia në Krimenë e pushtuar kanë shpallur një emergjencë rajonale pasi në brigjet e qytetit më të madh të gadishullit, Sevastopolit, u zbulua naftë.

Bëhet e ditur se nafta u derdh nga dy cisterna të goditura gati tre javë më parë në ngushticën e Kerçit, rreth 250 kilometra nga Sevastopoli.

“Sot është shpallur një regjim rajonal i emergjencës në Sevastopol”, tha guvernatori rajonal Mikhail Razvozhaev.

Nafta u gjet në katër plazhe në rajon dhe u “eliminua menjëherë” nga autoritetet lokale që punojnë së bashku me vullnetarët, shkruan euronews, përcjell Telegrafi

“Më lejoni të theksoj: nuk ka ndotje masive të vijës bregdetare në Sevastopol”, vazhdoi guvernatori.

Njoftimi i Razvozhaev vjen pasi autoritetet në Krasnodarin jugor të Rusisë njoftuan një emergjencë në mbarë rajonin javën e kaluar, pasi nafta vazhdoi të rridhte në vijën bregdetare 10 ditë pasi një cisternë u rrëzua dhe tjetra mbeti e dëmtuar.

Guvernatori rajonal i Krasnodarit, Veniamin Kondratyev tha se pothuajse 7,000 njerëz po punonin ende për të pastruar naftën.

Ndërsa më shumë se 96,000 ton rërë dhe tokë të kontaminuar janë hequr përgjatë vijës bregdetare të rajonit që nga derdhja fillestare.

Ndryshe, ngushtica e Kerçit, e cila ndan Gadishullin e Krimesë të pushtuar nga Rusia nga rajoni i Krasnodarit, është një rrugë e rëndësishme detare globale, duke siguruar kalimin nga deti i brendshëm i Azov në Detin e Zi.

Ajo ka qenë gjithashtu një pikë kyçe e konfliktit midis Rusisë dhe Ukrainës pasi Moska aneksoi gadishullin në 2014.

Në vitin 2016, Ukraina e çoi Moskën në Gjykatën e Përhershme të Arbitrazhit, ku e akuzoi se po përpiqej të merrte kontrollin e zonës në mënyrë të paligjshme. /Telegrafi/