Selena Gomez: Fejesa ka qenë ëndrra ime gjatë gjithë jetës

Selena Gomez ka zbuluar unazën e saj të fejesës, një diamant mahnitës i prerë në stilin markezë, vlerësuar rreth 1 milion dollar (950 mijë euro).

Ajo ndau lajmin emocionues në Instagram, duke treguar unazën pranë pishinës së shtëpisë së saj në Los Angeles dhe shkroi: “Kam ëndërruar këtë moment gjithë jetën time”.

Benny Blanco, producenti i njohur muzikor dhe partneri i saj, thuhet se propozoi gjatë një pikniku romantik. Në një nga postimet, Blanco e përkëdhelte Selenën, duke shkruar me humor: “Hej prit… kjo është gruaja ime”, shkruan DailyMail.

Çifti, të cilët janë bashkë që nga qershori 2023, kanë marrë urime nga miqtë e tyre të famshëm, duke përfshirë Taylor Swift, e cila ka ofruar të jetë vajza e luleve në dasmë.

Unaza e fejesës, një krijim i detajuar me diamant 8 karatësh dhe një shirit pavé prej ari të verdhë, është cilësuar nga ekspertët si një zgjedhje elegante dhe e përjetshme.

Sipas Laura Taylor nga Lorel Diamonds, prerja markezë jo vetëm që simbolizon luksin, por gjithashtu nxjerr në pah sofistikimin dhe stilin unik të Selenës.

Blanco dhe Selena kanë qenë miq për më shumë se një dekadë përpara se të fillonin romancën.
Në intervistat e fundit, ata kanë folur për fillimet e lidhjes së tyre, me Blanco duke rrëfyer se ishte Selena ajo që e ftoi për darkë. “Thjesht e putha, dhe pjesa tjetër është histori”, tha ai.

Selena, e njohur për marrëdhëniet e saj të mëparshme me yje si Justin Bieber dhe The Weeknd, duket se ka gjetur lumturinë me Benny Blanco, duke e quajtur atë “gjithçka absolute” të saj. /Telegrafi/