VLEN: Me BDI-në shëndetësia ishte në “vdekje klinike”

VLEN në një kumtesë për media thotë se “BDI po shfrytëzon edhe rastet më të dhimbshme për të ushqyer egot e saj të pafre”.

Nga VLEN thonë se “BDI është po ajo parti që, nga korrupsioni i saj, ka shkaktuar vdekjen e 14 qytetarëve në spitalin modular të Tetovës”.

“Kjo është po ajo parti që për dy dekada mbajti mijëra punonjës shëndetësorë në pasiguri, duke i mbajtur me kontrata të përkohshme dhe i përdori si vegla elektorale. Por, me Taravarin në krye të shëndetësisë, kjo praktikë e turpshme merr fund! Pasiguria e tyre po përmbyllet, duke filluar me sistemimin e mbi 1000 punonjësve mjekësorë!”

“Faktet nuk gënjejnë. Që kur VLEN ka marrë përgjegjësinë për shëndetësinë, gjërat kanë filluar të ndryshojnë. Për herë të parë pas 15 vitesh, lista pozitive e barnave është përditësuar, duke lehtësuar barrën e mijëra pacientëve. Vetëm këtë vit, falë angazhimit të ministrit Arben Taravari, janë pranuar 300 specializantë të rinj dhe 300 të tjerë do të pranohen vitin e ardhshëm”, thonë nga VLEN.

“A e dini si ishte Klinika e Fëmijëve kur BDI-ja non grata ishte në pushtet? Një rrënojë e vërtetë! Pa pajisje bazike, me kushte çnjerëzore dhe kuzhina të shkatërruara. Por, për vetëm gjashtë muaj, drejtori i ri, Rexhep Memedi, me punë të pandalshme, po e ngre Klinikën në këmbë. BDI-ја non grata e la shëndetësinë në “vdekje klinike”, por tani ajo po kthehet në jetë, falë përkushtimit dhe vizionit të Taravarit”, thonë nga VLEN.