Pentagoni kërkon bisedime mes Izraelit dhe SHBA-së mbi ngjarjet e fundit në Siri

Raportohet se Sekretari amerikan i Mbrojtjes, Lloyd Austin ka zhvilluar një bisedë telefonike me ministrin izraelit të Mbrojtjes, Israel Katz.

Bëhet e ditur se Austin ka kërkuar nga Katz të Izraeli dhe SHBA të konsultohen mbi ngjarjet që po zhvillohen në Siri.

Ndër tjera, Austin e ka njoftuar se Uashingtoni po monitoronte zhvillimet në Siri dhe se ai mbështet një tranzicion politik, paqësor e gjithëpërfshirës.

Sekretari amerikan i Mbrojtjes shtoi se SHBA do të vazhdojë misionin e saj për të parandaluar grupin militant të Shtetit Islamik, shkruan Reuters, përcjell Telegrafi.

Ndryshe, pas një avancimi të rrufeshëm, rebelët sirianë të udhëhequr nga lideri Abu Mohammed al-Golani i dhanë fund më shumë se 50 viteve të sundimit nga familja Assad – me presidentin Bashar al-Assad që u largua nga vendi me familjen e tij.

Pas rënies së regjimit të Assadit, ushtria izraelite tha se aeroplanët e saj kryen qindra sulme në Siri dhe shkatërruan pjesën më të madhe të rezervave të armëve strategjike të Sirisë.

“Sekretari Austin theksoi rëndësinë e konsultimit midis Shteteve të Bashkuara dhe Izraelit për ngjarjet në Siri”, tha Pentagoni.

Ai shtoi se Austin diskutoi gjithashtu me Katz përpjekjet për të siguruar pengjet izraelite në Gaza dhe i kërkoi Izraelit të përmirësonte situatën humanitare në enklavën palestineze ku sulmi ushtarak ka çuar në akuza për gjenocid dhe krime lufte. /Telegrafi/