Dosja e kokainës së fshehur në lëkurët e kafshëve, si u arrestua “Gafas” në Tiranë

Një rrjet kriminal i sofistikuar, që trafikonte kokainë përmes lëkurëve të kafshëve nga Republika Dominikane, është goditur nga SPAK.

Ndër personat e arrestuar është kolumbiani Hiëelenn Ledezma Narvaez, i njohur si “Gafas,” një emër i rëndësishëm në botën e krimit, i kërkuar edhe nga autoritetet kolumbiane.

“Gafas,” i cili qëndronte prej një viti në Shqipëri, është identifikuar si lider i një grupi të fuqishëm kriminal të trafikut të drogës në Kolumbi. Ai i kishte shpëtuar një operacioni të madh policor të quajtur “Pacifico” në nëntor 2023.

Në këtë operacion u arrestua shtetasi shqiptar Klodian Zaimi, që ka lidhje familjare me Artjon Çaushllarin, një nga financuesit kryesorë të tentativës për trafikimin e drogës.

Çaushllari është arrestuar nga SPAK tre javë më parë.

Prokuroria e Posaçme ka dokumentuar pagesën prej 40 mijë dollarësh për lëkurat e kafshëve që shërbenin si maskim për kokainën, si dhe udhëtimet në Republikën Dominikane të Aldi Zonja, një tjetër i arrestuar në këtë rast.

Hetimet e vazhdueshme kanë ngritur dyshime të forta se grupi kriminal ka bashkëpunuar me organizata të tjera për të nxjerrë kokainë në laboratorë të improvizuar në Shqipëri.

Një nga episodet kyçe të veprimtarisë së këtij grupi ndodhi në maj të këtij viti, kur “Gafas” u pa në një vilë në një fshat të Pogradecit, i shoqëruar nga Çaushllari dhe Klajdi Birçe, të dy tashmë të arrestuar.

Autoritetet dyshojnë se në atë vilë është nxjerrë një sasi kokaine, por operacioni nuk u ndërmor për të shmangur dekonspirimin.

SPAK po vazhdon hetimet për të zbuluar bashkëpunëtorët dhe përmasat e plota të këtij rrjeti kriminal, që konsiderohet si një nga më të sofistikuarit e kapur deri tani në Shqipëri.