Pazaret milionëshe në Prishtinë, LVV akuzon LDK-në për korrupsion në Kuvendin Komunal

Para 2 muajve

Shefi i asamblistëve të Lëvizjes Vetëvendosje në Prishtinë, Gëzim Sveçla, ka komentuar incidentin e fundit në Kuvendin Komunal të Prishtinës, ku ai ka dëmtuar pajisje gjatë seancës që miratoi buxhetin e vitit 2025.

Sveçla ka sqaruar se veprimi i tij nuk kishte të bënte me miratimin e buxhetit, por kishte për qëllim ndërprerjen e seancës, pasi disa vendime të propozuara ishin, sipas tij, të dëmshme për qytetin.

Në një konferencë për media, ai ka thënë se defunksionalizimi i mikrofonit ishte një aksion simbolik, i nevojshëm për të ndaluar përkohësisht seancën ku do të miratoheshin disa projekte që ai i konsideron si shkatërruese për Prishtinën.

“Rasti që ka ndodhur nuk ka të bëjë fare me miratimin e buxhetit, për shkak se disa media e kanë potencuar këtë si gjoja shkak i votimit të buxhetit. Unë e kam ndërmarrë një veprim, bëhet fjalë për defunksionalzimin e mikrofonit, i cili në një kohë shumë të shkurtë u funksionalizua sërish. D.m.th nuk bëhet fjalë për kurrfarë vandalizmi të sallës së Kuvendit, bëhet fjalë për një veprim politik, aksion simbolik, i cili ishte i domosdoshëm në mënyrë që të paktën përkohësisht të ndërpritet ajo seancë në të cilën do të merreshin disa vendime e që janë shumë të dëmshme për qytetin dhe për banorët e Prishtinës… Po jam i ftuar (nga Policia), në ora 14:00 do të shkojë në polici për të dhënë deklaratë për këtë çështje”, tha Sveçla.

Sekretari i Qendrës, Egzon Azemi, gjithashtu reagoi në konferencën për media, duke kërkuar nga prokuroria dhe organet e drejtësisë që të hetojnë pazaret milionëshe që po ndodhin në Komunën e Prishtinës.

Ai akuzoi figura të ndryshme brenda Lidhjes Demokratike të Kosovës (LDK) për përfshirje në këto pazare dhe tha se disa asamblistëve të caktuar iu janë ofruar shtëpi në këmbim të votave.

Azemi kërkoi që drejtësia të veprojë për të hetuar këto raste dhe të mbrojë qytetarët nga projekte që dëmtojnë qytetin.

“Po ftojmë prokurorinë e gjitha organet e drejtësisë që të reagojnë përballë pazareve milionëshe që po ndodhin në kryeqytetin e Republikës, në Komunën e Prishtinës. Devollët dhe biznesmenët të ndryshëm te lagjeve multimilioneshe private në kryeqytet, përveç se e kanë tashmë në dorë ekzekutivin e Komunës së Prishtinës kanë filluar një fushatë të blerjes së asamblistëve të Kuvendit komunal. Për këtë projekt të dëmshëm ka edhe figura të rëndësishme brenda LDK-së që e kundërshtojnë këtë projekt, andaj, nga këtu i lus që tash është momenti që të ngritën e të flasin kundër një projekti kaq të dëmshëm që rrezikon të ardhmen e kryeqytetit.

Mirëpo, kryetari Rama me një pjesë tjetër të profitereve e klientelisteve të kësaj partie janë të gatshëm me çdo kusht të shtyjnë përpara këtë projekt. Asamblistëve të caktuar u janë ofruar tre shtëpi në këmbim të blerjes së një vote. Pra, me pak fjalë qindra, mijëra euro po jepen që të ju mundësohen përfitime multimilioneshe…Prokuroria dhe hetuesia duhet të zgjohen nga gjumi që i ka kapluar dhe t’i hetojnë këto raste skandaloze”, tha Azemi.

Asamblistët e Vetëvendosjes zhvilluan gjithashtu një aksion simbolik, duke vendosur një baner me mbishkrimin “Komuna e Devollëve” për të protestuar kundër vendimeve që ata i konsiderojnë të dëmshme për qytetin.

Pas tre dështimeve për miratimin e buxhetit për vitin 2025 në seancat e jashtëzakonshme, sot u miratua buxheti me 25 vota për dhe një abstenim. /Telegrafi/