Plagosi me thikë 41-vjeçarin në Vlorë, arrestohet autori

Policia në Vlorë ka vënë në pranga 51-vjeçarin Abaz Rohani (alias Gjolek Memet), i cili gjatë mbrëmjes së djeshme plagosi me thikë Xhafer Kamberin.

Ngjarja që ndodhi në lagjen “15 Tetori” të qytetit bregdetar ishte një konflikt që nisi për motive të dobëta, por përfundoi me 41-vjeçarin në gjendje të rëndë në spital.

“Sektori për Hetimin e Krimeve të Rënda dhe Komisariati i Policisë Vlorë, në bashkëpunim me Forcën e Posaçme “Shqiponja”, menjëherë pas ngjarjes së ndodhur mbrëmjen e djeshme, në lagjen “15 Tetori”, ku u plagos me mjet prerës, një shtetas, organizuan punën duke ushtruar kontrolle për kapjen e autorit. Si rezultat, pas disa orësh kërkime, u gjet në banesën e vëllait të tij (aktualisht e pabanuar), në lagjen “Partizani”, dhe u arrestua në flagrancë shtetasi: A. R. alias Gj. M., 51 vjeç, banues në Vlorë. Ky shtetas dyshohet se më datë 01.12.2024, rreth orës 20:27, në lagjen “15 Tetori”, pas një konflikti për motive të dobëta, ka plagosur me mjet prerës (thikë), shtetasin Xh. K., 41 vjeç, banues në Vlorë, i cili ndodhet në Spitalin Rajonal Vlorë, në kujdesin e mjekëve”, sqaron policia.

Sakaq, efektivët e policisë po vijojnë kontrollet për gjetjen e thikës me të cilën është kryer plagosja. /Telegrafi/