“Rashë në depresion, ai nuk është as krijesë”, Fjolla Morina në një rrëfim të rrallë për ish-bashkëshortin Fisnik Syla

E tërhequr për më shumë se një vit nga paraqitjet publike, Fjolla Morina është rikthyer me rrëfimin e saj, për përjetimet e rënda psikologjike që pësoi për shkak të të bëmave nga ish-bashkëshorti i saj Fisnik Syla.

Në një intervistë për Prive, këngëtarja ka thënë se tash e një kohë është në terapi derisa ka qenë një fazë depresioni që e bëri edhe të binte në peshë në 40 kilogramë.

“Paraja nuk është kurrgjë çka kam përjetu unë. Krejt pasurinë e kisha dhënë timen, në zero e kisha lënë, kisha fjet në rrugë dhe e kisha ndërtu përsëri jetën time veç mos me e njoftë një krijesë si ai, ai nuk është krijesë bre, nuk mundem me quajt krijesë atë [Fisnikun] një njeri pa ndjenja me i bo këto sende. Është shumë e rëndë. Njerëzit e kanë përjetu anën materiale, por unë çka kom përjetu, anën shpirtërore, anën fizike, psikike, të karrierës, gjithçka për mu ka qenë goditje”, ka rrëfyer Fjolla.

“Krejt pasurinë e kisha dhon me u kthy edhe njëherë për mos me njoftë persona të tillë. Gjithmonë edhe vajzave ju them, kujdes gjithmonë me meshkuj”, u shpreh këngëtarja.

Në shtator të vitit 2020, Fjolla Morina u arrestua nga policia e Shqipërisë mbi akuzat për trafikim të armëve dhe municion. Bashkë me të u arrestua edhe shoferi i saj dhe ish-bashkëshorti i këngëtares, Fisnik Syla. Ky i fundit u lirua pas rreth dy javësh, që prej asaj kohe, këngëtarja u shpallë në kërkim ndërkombëtar nga Interpoli.

Kjo situatë duket të ketë qenë faktori kryesor që e rëndoi gjendjen psikike të artistes.

“Kjo ka qenë arsyeja që mu më ka bo keq, edhe erdha në këtë gjendje, qeky problemi i Shqipërisë dhe personi në fjalë që nuk po du as me ja përmend emrin. Për shkak të tij për një pistoletë të tij, edhe me ardhë deri në këtë gjendje unë. Kjo ka qenë arsyeja, mbyllja, presioni, çka po ndodh, intervistat e personit në fjalë, që del bon shantazhe, bën gjithçka, ato janë krejt energji negative”, ka thënë ajo mes tjerash.