Katari tërhiqet si ndërmjetës i bisedimeve mes Izraelit dhe Hamasit

Katari është tërhequr si ndërmjetës në bisedimet e armëpushimit dhe lirimit të pengjeve midis Izraelit dhe Hamasit.

Ky lajm vjen pasi zyrtarë të lartë amerikanë thanë se Uashingtoni nuk do të pajtohej më me praninë e përfaqësuesve të Hamasit në Katar, duke akuzuar grupin për refuzimin e propozimeve për përfundimin e luftës në Gaza.

Bëhet e ditur se Katari do të jetë gati të rifillojë rolin e tij si ndërmjetës nëse Izraeli dhe Hamasi do të tregojnë “gatishmëri të sinqertë për t’u kthyer në tryezën e bisedimeve”.

Hamasi ka pasur një bazë në kryeqytetin e Katarit që nga viti 2012.

Shteti i vogël por me ndikim i Gjirit është një aleat kyç i SHBA-së në rajon. Ai ka trajtuar shumë negociata delikate politike, duke përfshirë Iranin, talibanët dhe Rusinë.

Krahas SHBA-së dhe Egjiptit, Katari ka luajtur gjithashtu një rol të madh në raundet e bisedimeve të deritanishme për të ndërmjetësuar një armëpushim në luftën midis Izraelit dhe Hamasit në Gaza.

Raundi i fundit i bisedimeve në mes të tetorit dështoi të prodhojë një marrëveshje, me Hamasin që refuzoi një propozim armëpushimi afatshkurtër.

Izraeli është akuzuar gjithashtu për refuzimin e marrëveshjeve, shkruan BBC, përcjell Telegrafi.

Nëse Hamasi do të detyrohet të largohet nga Doha, është e paqartë se ku do ta vendosë bazën e tij politike.

Aleati kryesor Irani do të ishte një opsion, megjithëse vrasja e ish-udhëheqësit Ismail Haniyeh në Teheran në korrik sugjeron se ata mund të jenë në rrezik nga Izraeli nëse vendosen atje.

Një opsion më i mundshëm do të ishte Turqia.

Si një anëtar i NATO-s, por edhe një shtet me shumicë sunite, do t’i jepte grupit një bazë nga e cila të operonte në një siguri relative.

Mendohet se siguria personale e udhëheqjes së Hamasit është tani një shqetësim i madh për grupin, i cili pa dy udhëheqës të vrarë në më pak se katër muaj.

Sipas Këshillit Evropian të Marrëdhënieve me Jashtë, “Hamasi ka miratuar një model të përkohshëm të udhëheqjes kolektive për të zbutur efektin e vrasjeve të ardhshme izraelite”.

Ndryshe, masa e fundit vjen pasi zyrtarët amerikanë duken gjithnjë e më të frustruar me qasjen që qeveria izraelite ka marrë për t’i dhënë fund luftës.

Në tetor, Sekretarët e Shtetit dhe të Mbrojtjes të SHBA-së thanë se nëse Izraeli nuk do të lejonte më shumë ndihma humanitare në territor deri më 12 nëntor, ata do të përballeshin me “implikime” të papërcaktuara politike.

Marrëdhëniet midis presidentit amerikan, Joe Biden dhe atij izraelit, Benjamin Netanyahu, janë përkeqësuar gjatë rrjedhës së luftës në Gaza, me presionin në rritje nga Uashingtoni për të përmirësuar situatën humanitare për palestinezët dhe për të gjetur një lloj zgjidhjeje të negociuar.

Ndërsa saktësisht se çfarë qasje do të marrë Trumpi mbetet e pasigurt, ai mendohet se ka më shumë gjasa të lejojë Izraelin të veprojë sipas kushteve të tij.

Ai ka thënë më parë se Izraeli duhet të “përfundojë atë që filloi” në Gaza. /Telegrafi/