Çelja e negociatave për pesë kapitujt kryesorë, Rama: Gurthemeli historik drejt ribashkimit tërësor evropian

Kryeministri Edi Rama e cilësoi sot çeljen e negociatave për grup-kapitullin “Themeloret”, një gurthemeli historik në rrugëtimin e përbashkët drejt ribashkimit tërësor evropian.

Pas mbledhjes së Këshillit të Bashkimit Evropian në Luksemburg, kryeministri Rama doli në një deklaratë të përbashkët për mediet me Péter Szijjártó, ministër i Punëve të Jashtme dhe Tregtisë të Hungarisë, e cila mban edhe presidencën e radhës së BE-së dhe Komisionerin e BE-së për Fqinjësinë dhe Zgjerimin, Olivér Várhelyi.

Rama vlerësoi se çelja e grup-kapitullit të “Themeloreve” sot me 5 kapitujt kryesorë dhe 3 kriteret, përbën një arritje të madhe për të dyja palët, si për Shqipërinë, ashtu edhe për BE-në.

“Nuk na duhet një kujtesë e rëndësisë për të qëndruar e punuar së bashku të lidhur nga parimet dhe vlerat që përkufizojnë BE-në. Kjo është veçanërisht e vërtetë në këto kohëra sfiduese kur një mori krizash na janë qasur me nevojën për të qenë më pranë dhe për të qëndruar të gjithë së bashku dhe nevojën e mirëfilltë për t’u përballur me veten dhe kuptuar mënyrën për të ecur para”, tha Rama.

Kryeministri theksoi se, për fat të keq, ishte me “ndihmën” e Vladimir Putinit që ky proces mori një shpejtësi të re, pas agresionit të tij në Ukrainë.

“Ky agresion shërbeu si një zile zgjimi që i kujtoi Evropës që iluzioni i vetëmjaftueshmërisë është vetëm një iluzion dhe të qartësojë në mënyrën më të vështirë, se keni nevojë për Ballkanit Perëndimor, po aq sa Ballkani Perëndimor ka nevojë për BE-në”, tha Rama.

Më tej, Rama deklaroi se Shqipëria nuk mund të ketë një “plan B”, kur vjen fjala për liri individuale, sundimin e ligjit dhe demokracinë funksionale.

“Dje një gazetar më pyeti nëse Shqipëria ka një ‘plan B’, nëse BE edhe një herë vonon, apo e ndërlikon procesin, ashtu siç fatkeqësisht ka bërë në të shkuarën. Po, për fat të keq është e vërtetë se BE herë-herë mund të jetë e padrejtë dhe është treguar e padrejtë ndaj vendeve kandidate. U tregua e padrejtë ndaj nesh kur hodhi poshtë vetë rekomandimet e Komisionit të vet, mbështetur në fakte dhe në atë që e bën Komisionin Evropian raport-hartuesin më të besueshëm për të nisur bisedimet me Shqipërinë më shumë se një herë”, tha Rama.

Rama theksoi se shqiptarët nuk mund të kenë një “plan B”, kur vjen fjala për liri individuale, sundimin e ligjit dhe demokracinë funksionale.

“Megjithatë ne historia na ka mësuar në mënyrën më të vështirë se kjo nuk mund të gjendet apo edhe madje të garantohet jashtë aferës së BE-së. Këto janë A-ja, B-ja dhe C-ja e mënyrës së jetesës evropiane”, tha Rama.

Sipas tij, “zgjedhja e një alternative ndaj anëtarësimit të plotë në BE do të ishte të hiqje dorë nga mënyra e jetesës që së fundmi zgjodhëm, pasi duruam epoka errësire nën perandori e regjime që na u imponuan”.

“Për ne nuk është një retorikë proeuropiane, është çështje jete a vdekje për ëndrrën tonë që t’u lëmë brezave të ardhshme një vend ku liria individuale është e padiskutueshme dhe sundimi i ligjit respektohet, e demokracia funksionon për gjithkënd. Alternativat ndaj kësaj ëndrre janë vetëm makthe të llojeve të tjera”, shtoi ai. /Telegrafi/