Seancë e jashtëzakonshme në Pejë për projektin Borea

Komuna e Pejës ka mbajtur një seancë të jashtëzakonshme lidhur me projektin Borea, ku kryetari Gazmend Muhaxheri ka dhënë shpjegime për arsyet pse ky projekt nuk është realizuar deri më tani.

Ai ka theksuar se shumica e procedurave janë përmbushur, përfshirë edhe shpronësimet, me përjashtim të dy rasteve që janë ende në gjyq, transmeton Telegrafi.

“Krejt procedurat çka kanë qenë për t’i plotësuar, shpronësimit, kthimit të tokës në emër të komunës, shpronësimet që është dasht me i bë për trasen e Boresë, kanë përfunduar përveç dy që jemi në gjyq, përndryshe nuk kemi asnjë pengesë për t’u realizuar ky projekt”, ka thënë Muhaxheri.

Ai ka vazhduar pastaj duke kërkuar falje qytetarëve dhe anëtarëve të Kuvendit Komunal për mosrealizimin e këtij projekti, edhe pse shtoi se ka menduar që ky projekt ishte afër finalizimit.

“Me miratimin e hartës zonale të Parkut Nacional të Bjeshkëve të Nemuna neve na është hapur rruga dhe kemi menduar që kemi për të realizuar pa asnjë pengesë. Në një debat kam pas thënë që nuk munden ata nga Prishtina me vendos për projektin e Boreas, tash unë po dua të ju kërkoj falje qytetarëve të Pejës dhe juve asamblistëve që e kam pas gabim”, ka shtuar ndër të tjera Muhaxheri.

Seanca është duke vazhduar, ku është duke u diskutuar vetëm për këtë pikë të rendit të ditës. /Telegrafi/